Me 82 votat kundër të mazhorancës dhe vetëm 27 vota pro të opozitës, u rrëzua kërkesa e PD që të zgjatej me 3 muaj afati për komisionin e reformës territoriale.
Sipas bashkëkryetarit demokrat të komisionit, Luçiano Boçi, puna e tij duhet zgjatur pasi nuk kishte përfunduar misioni për të cilin ishte ngritur. “Nuk janë dëgjuar të gjithë kryebashkiakët, nuk është folur për 1/3-tën e Shqipërisë, Tiranën”, tha ai.
Por kreu i grupit parlamentar të PS, Taulant Balla, hodhi poshtë këtë pretendim, duke thënë se kjo çështje duhet të ishte diskutuar në seancën e kaluar. “Ai tren ka ikur tashmë”, tha Balla.
Sakaq, kryetari i Partisë Demokratike, Sali Berisha, tha se raporti i PS-së për reformën territoriale është i paligjshëm, dhe se raporti sipas tij, nuk është paraqitur në komisionin e reformës.
“Raporti që pretendoni të paraqisni sot është absolutisht i paligjshëm. Nuk është miratuar në komisionin parlamentar dhe në praktikën dhjetëra vjeçare, komisionet bipartizane kanë shtyrë sa herë ka qenë e nevojshme afatet. Ju sot paraqiteni këtu me një raport që nuk është paraqitur në komisionin e reformës. Ky është një brutalitet”,- u shpreh Berisha.
Kujtojmë se Partia Demokratike depozitoi mëngjesin e sotëm, zyrtarisht kërkesën për zgjatjen me 3 muaj të mandatit të Komisionit të Posaçëm Parlamentar për Reformën Administrativo-Territoriale.
Kërkesa e firmosur nga bashkëkryetari i këtij komisioni, Luçiano Boçi, bazohej në argumentin se objektivat kryesore të projektkalendarit nuk janë realizuar ende dhe se vendimmarrja nuk mund të përmbyllet pa garantuar, sipas tij, një proces të plotë konsultativ dhe pa marrë një opinion zyrtar nga Këshilli i Evropës.
Po ashtu vihej në dukje se Komisioni ndodhet ende në fazën e konsultimeve publike, dhe nuk është zhvilluar ende konsultimi publik në qarkun më të madh, Tiranën, si dhe s’janë zhvilluar dëgjesat me 8 kryetarë bashkie. Megjithatë, me votat e mazhorancës, kjo kërkesë e PD-së është rrëzuar.
