Njëqind vite burg për klanin e kokainës të arrestuar gjatë operacionit “Icaro”. Mes 15 të dënuarve është edhe 26-vjeçari që përplasi për vdekje efektivin Francesco Imprezzabile në Peschiera.
Nga Simone Bracchi, GIORNALE DI BRESCIA
Pesëmbëdhjetë dënime, për një total prej 100 vitesh burg. Prej tyre, 8 vjet burg iu dhanë Genti Berishës, i cili më 23 qershor shkaktoi aksidentin rrugor ku humbi jetën efektivi i Policisë Lokale të Milanos, Francesco Imprezzabile, në Peschiera Borromeo.
Kështu përfundoi më 21 korrik gjykimi me procedurë të shkurtuar ndaj anëtarëve të organizatës së përfshirë në trafikun ndërkombëtar të kokainës.
Operacioni, i quajtur “Icaro”, u zhvillua nga hetuesit e Shërbimit Qendror Operativ (SCO), SISCO dhe Skuadrës Mobile të Brescias, nën koordinimin e Drejtorisë Distriktuale Antimafia të Brescias, në bashkëpunim me prokurorinë speciale shqiptare SPAK.
Dënimet
Ndër dënimet më të rënda spikasin ato ndaj dy vëllezërve shqiptarë, me origjinë nga Elbasani, të cilët konsideroheshin në krye të “qelizës së Brescias” të organizatës kriminale.
Ata u dënuan përkatësisht me rreth 14 dhe 15 vjet burg.
Sipas hetuesve, klani shqiptar kishte ngritur një qelizë operative në Brescia, e drejtuar nga dy vëllezërit shqiptarë Gerardo Pashja dhe Shkëlqim Pashja.
Ata mbështeteshin nga: Simone Paolisso (i lindur në 1981), Roberto Gottardi (1973), Fabrizio Manza (1988), të cilët merreshin me transportimin dhe magazinimin e drogës.
Ndërsa një tjetër banor i Brescias, Marco Morandi (1960), së bashku me emisarë të tjerë të klanit, mbante kontaktet me nivelet më të larta të organizatës.
Nga kokaina e shitur në lokalet e zonës së Liqenit Garda, si në anën e Veronës ashtu edhe të Brescias, hetuesit arritën të rindërtonin të gjithë rrjetin e trafikut, duke përdorur sekuestrimet dhe arrestimet, që në fillim dukeshin të palidhura me njëra-tjetrën.
Hetimi
Në nëntor 2021, Simone Paolisso u ndalua nga Policia Rrugore e Veronës në autostradë me 250 kilogramë kokainë të pastër, ende të papërzier, një nga ngarkesat e destinuara për qelizën kriminale të Brescias.
Falë një pune të kujdesshme me ndjekje, përgjime dhe bashkëpunim mes policisë italiane dhe asaj shqiptare, autoritetet arritën të rindërtonin të gjithë aktivitetin e klanit.
Sipas hetimeve, vëllezërit e klanit Çela, nga Elbasani, lëviznin në mbarë botën: drejt Kolumbisë dhe Ekuadorit për të takuar prodhuesit e kokainës në Amerikën e Jugut; si edhe në Emiratet e Bashkuara Arabe, përfshirë Dubain.
Ngarkesat e kokainës së pastër mbërrinin në portet e Belgjikës dhe Holandës, ku organizata kishte bashkëpunëtorë mes punonjësve të porteve.
Më pas droga ngarkohej në kamionë të modifikuar posaçërisht, të cilët transportonin mallin në magazina të marra me qira në Brescia.
Pasi mbërrinte në Brescia, kokaina, që në atë fazë kishte një vlerë me shumicë prej rreth 40 mijë euro për kilogram, shpërndahej te organizata më të vogla kriminale në qytete të ndryshme të veriut të Italisë.
Prokurorja Roberta Panico, e cila drejtoi hetimet, kishte deklaruar: “Nuk ishte e lehtë të ndiqnim lëvizjet e këtij grupi. Këta persona komunikonin mes tyre vetëm përmes telefonave të enkriptuar.”
