Policia e Tiranës ka proceduar penalisht 29 persona lidhur me protestën e sotme të opozitës. Sipas një njoftimi zyrtar, policia e Tiranës ka arrestuar 6 persona për veprat penale të kundërshtimit të punonjëvse të policisë, goditje për shkak të detyrën dhe prishje të qetësisë publike.
Mes personave të arrestuar është edhe Dorian Protoduari. Disa qindra persona protestuan para drejtorisë së Policisë së Tiranës, ku kërkuan lirimin e të arrestuarve.
Babai i Dorian Protoduarit paralajmëroi kreun e policisë së Tiranës, Dhimitraq Ziu, lidhur me arrestimin e djalit të tij.
Babai i Ziut kishte kërkuar dënimin me vdekje të gjyshit të Dorian Protoduarit gjatë regjimit komunist, ndërsa sot kreu I Policisë së Tiranës, mban të arrestuar nipin e të dënuarit të kohës së diktaturës.
Njoftimi i policisë
Policia e Tiranës nën drejtimin e Prokurorisë së Rrethit Gjyqësor Tiranë ka arrestuar 6 shtetas, për veprime të dhunshme mbi institucionet Kushtetuese, mbi Policinë dhe për shkatërrimin e pronës gjatë zhvillimit të protestës së opozitës nga Partia Demokratike dhe Lëvizja Socialiste për Integrim, ditën e sotme para parlamentit.
Veprimet proceduriale janë kryer në bazë të një analize të pamjeve filmike, raport shërbimeve, si dhe provave të tjera të mbledhura nga grupi hetimor.
Janë proceduar në gjendje të lirë dhe 17 persona të tjerë, ndërsa 6 shtetas janë shpallur në kërkim.
Është proceduar penalisht gjithashtu shtetasi G.B., organizator i protestës.
Janë arrestuar për konsumimin e elementëve të veprave penale “Kundërshtimi i punonjësit të policisë së rendit publik”, “Goditje për shkak të detyrës” dhe “Prishja e qetësisë publike” shtetasit:
– J.Gj., 24 vjeç, nga Shijaku;
– M.D., 24 vjeç, nga Mamurrasi;
– A.K., 20 vjeç, nga Rrësheni;
– B.D., 36 vjeç, nga Kavaja;
– E.M., 26 vjeç, nga Kavaja;
– D.P., 31 vjeç, nga Tirana.
Po punohet për identifikimin, kapjen dhe vënien para përgjegjësisë ligjore të personave të tjerë që kanë kryer veprime të dhunshme gjatë protestës së djeshme.
Materialet proceduriale do t’i referohen Prokurorisë së Rrethit Gjyqësor Tiranë, për veprime të mëtejshme.
