Komisioneri për Zgjerimin i BE-së, Johanes Hahn, u shpreh në mbështetje të protestave dhe lirisë së shprehjen në vendet e Ballkanit, por shtoi se dhuna është e papranueshme dhe e dënon atë.
Nga Brukseli, Hahn deklaroi se ndryshimet politike mund të bëhen vetëm përmes proceseve demokratike, përfshirë zgjedhjet, dhe se Bashkimi Evropian nuk do të jetë arbitër në atë se kush do të jetë në pushtet.
“Ata që kërkojnë prej nesh që të sigurojmë diku sundimin e ligjit, janë të njëjtit që besojnë se ne mund të hyjmë si forcë ushtarake të përjashtojmë qeverinë aktuale dhe të zëvendësojmë atë me një tjetër. Ne nuk e kuptojmë kështu sundimin e ligjit, demokracinë dhe transparencën”, tha Hahn.
Ai u zotua se do të vazhdojnë të mbrojnë parimet evropiane, por e refuzoi dhunën si një mjet politik. Komesionari për Zgjerim, Johanes Hahn, së bashku me përfaqësuesen e lartë, Federica Mogherini takuan në Bruksel kryeministrin e Maqedonisë së Veriut, Zoran Zaev.
Shefja e Diplomacisë Evropiane, Federica Mogherini, theksoi se shembulli i Maqedonisë së Veriut duhet të shërbejë si një motiv për vendet tjera në rajon.
Serbia, Mali i Zi dhe Shqipëria, janë përfshirë nga protestat antiqeveritare. Të shtunën në Beograd, protestuesit hynë me forcë në objektet e Radio Televizionit të Serbisë duke nxitur reagimin e policisë dhe arrestimin e disa prej protestuesve. Në Tiranë, opozita ka mbledhur të paktën 3 herë në mitingje të ndryshme, disa mijëra qytetarë, që kërkojnë largimin e qeverisë Rama. Dorëzimi i mandateve të deputetëve nga opozita ka thelluar krizën politike në vend, pavarësisht përpjekjeve të qeverisë për të emëruar një opozitë të re, duke shpresuar në mbylljen e vakancës parlamentare përmes kandidatëve të përfshirë në listat zgjedhore.
