Prej disa ditësh në Tiranë dhe qytetet kryesore të vendit kanë shpërthyer revoltat e qytetarëve, kryesisht të rinj, kundër vrasjes së 25-vjeçarit Klodian Rasha nga një efektiv policie.
Protestat kanë shpërthyer si një revoltë e të rinjve kundër dhunës policore, ndërsa pas dorëheqjes së Sandër Lleshajt, kërkohet ajo e Drejtorit të Përgjitshëm të Policisë, Ardi Veliu.
Policia ka përdorur dhunën ndaj protestuesve, duke mos kursyer as të miturit, që rrihen dhe shoqërohen në komisariate.
Ende nuk ka një hetim nga SHÇBA mbi veprimet e policisë, ndërsa Avokati i Popullit raporton çdo ditë numrin e personave të shoqëruar dhe denoncimet e tyre për dhunë.
Pas nisjes së protestave, ambasadorja amerikan Yuri Kim, publikoi një deklaratë, ku kërkonte mes të tjerash shmangien e dhunës, ndërsa kërkoi marrjen e përgjegjësive nga ata që janë në qeverisje, por edhe ato që pretendojnë të vijnë në qeverisje.
Deklarata e Kim shkaktoi një seri reagimesh. Ndërkohë ish-ministri i Drejtësisë, Ylli Manjani, ka ironizuar ambasadoren amerikane, ndërsa në rrjet shkruan se po pret postimin e rradhës me një urrah nga zonja Kim, për arrestimet e adoleshentëve.
“Policia që nuk ka ekzekutuar ende urdhërin e arrestimit ndaj Lul Berishës (dhe jo vetëm), dhunon, ndalon e çon për arrest të rinj e të mitur të pafajshëm.
Ky “sukses” i jashtzakonshëm meriton një urra nga zonja Kim. Po e presim twitterin e saj”, shkruan Manjani.
