Kreu i PD-së, Lulzim Basha, dhe ish-deputetë të opozitës, janë mbledhur në selinë e Partisë Demokratike, në prag të nisjes së protestës para Kuvendit të Shqipërisë. Disa dhjetra mbështetës të opozitës kanë pritur me ovacione mbërritjen e Bashës në selinë e PD-së, nga ku pritet që të nisen drejt godinës së Parlamentit.
Policia që në orët e para të mëngjesit ka vendosur nën shtetrrethim Kuvendin, duke bllokuar tërësisht pedonalen, e cila është përdorur si rrugë për kalimin e deputetëve.
Ndërkohë, sikundër raportohet disa qindra qytetarë nga Elbasani kanë udhëtuar drejt Tiranës, për t’iu bashkuar protestës.
Kreu i degës së PD për Elbasanin Eugen Isai tha për mediat se protestuesit elbasanas kanë udhëtuar me automjetet e tyre private drejt Tiranës pasi organizimi me autobusë ishte i pamundur për shkak se drejtuesit e këtyre automjeteve dhe bizneset e tyre ndjehen të kërcënuar nga segmentet e ndryshme të shtetit.
“Pavarësisht presioneve dhe shantazheve me qindra e qindra qytetarë nga Elbasani dhe Njësitë Administrative të kësaj bashkie- theksoi Isai- mbërritën në kryeqytet para parlamentit për të protestuar”.
Ndërkohë që pjesëmarrje masive kanë raportuar edhe degët e PD të rretheve Gramsh, Peqin e Librazhd.
Mbi 1200 punonjës policie janë angazhuar për të mbrojtur Kuvendin dhe deputetët, ndërsa në oborrin e godinës, ndodhet edhe një makinë me ujë, që përdoret për shpërndarjen e protestuese.
