Shtetit më i ri në Europë mban këtë të dielë (9 shkurt) zgjedhjet parlamentare, ku rreth 2 milionë qytetarë do të zgjedhin përfaqësuesit e tyrë në Parlament. Në këto zgjedhje, marrin pjesë në garë 28 subjekte politike dhe një kandidat i pavarur.
Ndërsa janë katër kandidatë për kryeministër: Albin Kurti nga LVV-ja, Bedri Hamza nga PDK-ja, Lumir Abdixhiku nga LDK-ja dhe Ramush Haradinaj nga koalicioni AAK-Nisma dhe partnerët e tjerë.
28 subjektet politike me 1.280 kandidatë, konkurrojnë për mbështetjen e rreth dy milionë votuesve për të siguruar vendet në parlamentin 120 vendesh të Kosovës. Njëzet nga këto vende u takojnë pakicave kombëtare nga të cilat dhjetë janë për komunitetin serb, nga radhët e të cilit konkurrojnë gjashtë subjekte politike. 125 852 mijë qytetarë votojnë për herë të parë.
Votimi ka nisur në orën 07:00 të mëngjesit së sotëm, 9 shkurt, dhe mbyllet në orën 19:00 në gjithë territorin e Republikës së Kosovës. 941 qendra votimi janë hapur në 38 komunat e Kosovës, ndërsa votimi ka nisur edhe në Mitrovicën e Veriut. Kjo është hera e parë që qytetarët serbë në veri u rikthehen kutive të votimit prej vitit 2022, kur Lista Serbe – partia më e madhe e serbëve në Kosovë – ishte tërhequr nga institucionet e Kosovës dhe u kishte bërë thirrje serbëve që t’i bojkotonin proceset e ardhshme zgjedhore. Qytetarëve iu bashkua edhe kryetari i Listës Serbe, Zllatan Ellek
Për herë të parë, në zgjedhje ka votuar edhe diaspora. Dje, 8 shkurt, përfundoi procesi i votimit për emigrantët në përfaqësitë diplomatike. Nga 20.324 votuesit e regjistruar, 14.463 qytetarë kanë votuar, apo 71.16 për qind.
Për një muaj me radhë partitë politike bënë fushatë me zotimet për rritje pagash e pensionesh, përmirësim të arsimit dhe shërbimeve shëndetësore dhe për të luftuar papunësinë në vendin më të varfër në Evropë.
Zgjedhjet, të nëntat me radhë që nga përfundimi i luftës së viteve 1998-1999 që mori fund me ndërhyrjen e NATO-s, shihen si një sprovë për kryeministrin Albin Kurti, partia e të cilit fitoi me një rezultat të thellë në vitin 2021 dhe tashmë kërkon mandatin e dytë. Kjo është hera e parë që nga shpallja e pavarësisë së Kosovës në vitin 2008, që parlamenti i Kosovës përmbushi mandatin e plotë katërvjeçar.
Zëdhënësi i KQZ në Kosovë mban konferencën e parë: Votimi ka filluar në të gjitha qendrat
Zëdhënësi i KQZ në Kosovë, Valmir Elezi ka mbajtur konferencën e parë për mediat, ku ka dhënë detaje nga nisja e procesit të votimit.
Po ashtu, Elezi u shpreh se janë 1 970 944 votues, 28 subjekte politike dhe 1279 kandidatë.
“Në të gjitha qendrat e votimi ka filluar procesi i votimit. Përveç votimit të rregullt në këto qendra, KQZ ka caktuar edhe 38 qendra te votimit me kusht nga një për cdo komunë. Numri i shtetasve të Kosovës me të drejtë votë eshtë 1 970 944 votues. Numri i subjekteve që marrin pjesë është 28, nga këto 20 janë parti politike, 5 koalicione, dy nisma qytetare dhe një kandidat i pavarur. Numri i kandidatëve është 1279 kandidatë. KQZ u bën thirrje qytetarëve me të drejtë vote që ta shfrytëzojnë të drejtën kushtetuese”, tha Valmir Elezi zëdhënësi i KQZ.
Zgjedhjet në Kosovë, serbët mblidhen në Mitrovicë për të votuar
Teksa në Kosovë sot mbahet zgjedhjet parlamentare, qytetarët serbë janë mbledhur në sheshin kryesor të Mitrovicës së Veriut për të votuarsë bashku.
Kjo është hera e parë që ata u rikthehen kutive të votimit prej vitit 2022, kur Lista Serbe, partia më e madhe e serbëve në Kosovë, ishte tërhequr nga institucionet e Kosovës dhe u kishte bërë thirrje serbëve që t’i bojkotonin proceset e ardhshme zgjedhore.
Atyre u është bashkëngjitur kryetari i Listës Serbe, Zllatan Ellek, i cili ka votuar pas një bojkoti dy vjeçar.
Ellek, partia e të cilit po ashtu është pjesëmarrëse në zgjedhje, votoi në shkollën “Sveti Sava” në Mitrovicë të Veriut, i shoqëruar me pjesëtarë të partisë së tij dhe qytetarë të tjerë serbë.
Në zgjedhjet e kësaj të diele marrin pjesë gjashtë subjekte politike që përfaqësojnë komunitetin serb: Lista Serbe, Lëvizja Popullore Serbe, Demokracia Serbe, Partia e Serbëve të Kosovës, Për Liri, Drejtësi dhe Mbijetesë dhe Nisma Qytetare Drejtësia Popullore.
Voton Haradinaj, kreu i AAK thirrje qytetarëve: Dilni të votoni
Ramush Haradinaj, kreu i Aleancës për Ardhmërinë e Kosovës (AAK), ka votuar sot në zgjedhjet e Kosovës së bashku me familjen e tij.
Në një prononcim për mediat, ai i bëri thirrje qytetarëve që të dalin të votojnë pasi vota ka vlerë vetëm në kuti.
Kosova- u shpreh ai- ka nevojë për votën tuaj.
“I bëj thirrje qytetarëve dilni të votoni, vota juaj ka vlerë vetëm në kuti. Kosova ka nevojë për votën tuaj, na priftë e mbara dhe suksese së bashku”, tha Ramush Haradinaj, i cili bëri të ditur se dy fëmijët e tij votojnë për herë të parë.
Kosova në zgjedhje, voton kreu i PDK: Sot sovrani vendos
Pas Ramush Haradinajt, ka votuar edhe kreu i Partisë Demokratike të Kosovës (PDK) dhe njëkohësisht kandidati për kryeministër Bedri Hamza.
Nga qyteti i Mitrovicës, Hamza i ka bërë thirrje që të gjithë qytetarët e Kosovës të votojnë, po ashtu.
“Në fund sovrani vendos, qytetarët votojnë. Për mua çdo rezultat që votojnë qytetarët e Kosovës është i pranueshëm, jam optimist. Ka qenë një fushatë e gjatë, por jam i lumtur që gjatë gjithë kohës e kemi ruajtur pozitivitetin” deklaroi ai.
Thirrje për të dalë në votime kanë bërë edhe kandidatët e tjerë për kryeministër.
Voton kryeministri Albin Kurti, mesazh për qytetarët: Bëni zërin tuaj të dëgjohet!
Kryeministri i Kosovës Albin Kurti sapo ka votuar në një nga qendrat e votimit në Prishtinë.
Pasi ka votuar, Kryeministri ka dhënë edhe një mesazh për qytetarët duke u bërë thirrje të votojnë.
“Ditë e re dhe mot me diell për zgjedhjet e para të rregullta parlamentarë në shtetin e pavarur të Kosovës. Inkurajoj qytetarët të votojnë. Ushtroni të drejtën demokratike që të bëni zërin tuaj të dëgjohet. Përdorni lirinë për të vendosur për 4 vitet e ardhshme”, tha ai.
Zgjedhjet/ Voton Lumir Abdixhiku: Qytetarët e Kosovës të vendosin fatin e tyre
Kreu i LKD-së Lumir Abdixhiku, ishte i fundit nga kandidatët për kryeministër që votoi sot në zgjedhjet parlamentare të Kosovës.
Abdixhiku ftoi të gjithë qytetarët me të drejtë vote që të votojnë për të vendosur për “fatin e tyre dhe të Republikës së Kosovës” për katër vjetët e ardhshëm.
“Është ditë e demokracisë dhe në këtë ditë të demokracisë ftoj qytetarët e Kosovës që të marrin pjesë masivisht në vendosjen e fatit të tyre për katër vjetët e ardhshme të dhe Republikës së Kosovës”, ka thënë Abdixhiku.
