Kryeministri i Kosovës, Albin Kurti, ka përuruar Muzeun e Masakrës në Lagjen e Boshnjakëve në veri të Mitrovicës, në kujtim të nëntë civilëve shqiptarë që u torturuan dhe u vranë nga forcat serbe më 15 prill 1999.
Gjatë ceremonisë, Kurti tha se shtëpia e Mustafë Sahitit, e shndërruar tashmë në Muzeun e Viktimave, mbetet një dëshmi e krimeve të kryera gjatë luftës së fundit në Kosovë dhe një kujtesë e përhershme për vuajtjet e qytetarëve shqiptarë.
Sipas tij, ky projekt, me vlerë prej afër 150 mijë eurosh, përfaqëson një investim të rëndësishëm në ruajtjen e kujtesës kolektive dhe në edukimin e brezave të rinj për ngjarjet e së kaluarës.
“Ky vend i kujtesës është investim në vetëdijen historike të shoqërisë sonë dhe në edukimin e brezave të rinj. Pa të vërtetën nuk mund të ketë drejtësi të plotë, ndërsa pa drejtësi nuk mund të ketë paqe të qëndrueshme”, u shpreh Kurti.
Muzeu synon të shërbejë si hapësirë për dokumentimin e krimeve të luftës, ruajtjen e kujtesës historike dhe nderimin e viktimave të masakrës së 15 prillit 1999.
