Këshilli i Bashkimit Evropian ka miratuar të enjten hapjen e negociatave me Kosovën, Shqipërinë, Bosnjë-Hercegovinën, Malin e Zi, Maqedoninë e Veriut dhe Serbinë për heqjen e roaming-ut, duke mundësuar që së shpejti qytetarët e këtyre vendeve të mund të përdorin telefonat e tyre pa tarifa shtesë gjatë udhëtimeve në territorin e BE-së.
Sistemi “Roam Like at Home” mundëson që qytetarët të bëjnë thirrje telefonike, të dërgojnë mesazhe dhe të përdorin internetin kur udhëtojnë jashtë vendit pa paguar tarifa shtesë, derisa kjo zonë mbulon BE-në, vendet e Zonës Ekonomike Evropiane – Islandën, Lihtenshtajnin dhe Norvegjinë – dhe së fundmi edhe Moldavinë e Ukrainën.
Marilena Raouna, zëvendësministre për Çështje Evropiane e Qipros – shtet që aktualisht kryeson Këshillin e BE-së – deklaroi të enjten se ky vendim dërgon një sinjal të qartë të përkushtimit të BE-së ndaj vendeve të rajonit të Ballkanit Perëndimor.
Shtetet e Ballkanit Perëndimor detyrohen të harmonizojnë legjislacionin dhe të zbatojnë rregullat e BE-së përpara se t’i bashkohen zonës “Roam Like at Home”. Komisioni Evropian pastaj do të vlerësojë zbatimin e obligimeve dhe, nëse rezultati është pozitiv, do të konfirmojë se janë plotësuar kushtet për hapjen reciproke të tregjeve të roaming-ut mes shteteve të BE-së dhe atyre të Ballkanit Perënidmor.
