Policia e Tiranës procedoi sot penalisht dhe i referoi materialet në SPAK për 23 deputetë të opozitës, në lidhje me tensionet e shkaktuara ditën e djeshme në Kuvend.
Ndërkohë, socialistët kërkojnë përjashtimin e 24 deputetëve të PD-së nga aktivitetet parlamentare , për ta lënë Kuvendin ashtu siç e do Edi Rama pa opozitë.
Në lidhje me këto dy akte, kreu i grupit parlamentar të PD-së, Gazment Bardhi ka reaguar për BIRN, ku e konsideroi procedimin penal të deputetëve si përdorim të policisë nga pushteti kundër opozitës. Sipas tij, Rama nuk do të arrijë dot ta trembë opozitën.
“Edi Rama dhe vegla e Ergys Agasit në Ministrinë e Brendshme nuk e trembin dhe nuk do ta trembin dot Opozitën. Partia Socialiste e ka ngritur krimin në sistem dhe sot po tenton të zhbëje opozitën,” tha Bardhi, duke shtuar se “nuk i trembemi metodave autoritare që po i rijetëson Edi Rama sot”.
Partia Demokratike radikalizoi ditën e djeshme aksionin e saj në Kuvend, për mos lejimin e zhvillimit të seancave plenare, pas burgosjes së deputetit Ervin Salianji, duke e konsideruar dënimin si një hakmarrje politike të Edi Ramës dhe Fatmir Xhafajt.
