Drejtuesi i PD-së për Tiranën, Belind Këlliçi, ka publikuar një foto ku Policia Bashkiake e Erion Veliajt, po i merr perimet një gruaje të moshuar që po i shet në rrugë.
Me ironi, Këlliçi e quan këtë një superaksion të Policisë Bashkiake. Ai thekson se e njëjta Polici Bashkiake vijon të menaxhojë biznesin mafioz të dherave në inceneratorin fantazmë të Tiranës.
“Live nga super aksioni i Policisë Bashkiake për goditjen e nënave që shesin disa tufa majdanoz… Ndërkohë që po e njëjta Polici Bashkiake vijon të menaxhojë biznesin mafioz të dherave në inceneratorin fantazmë të Tiranës. Doemos, pronari faktik i inceneratorit Erion Veliaj është disi në hall këto kohë. Duhen lekë se nuk i dihet si shkojnë punët“, shkruan Këlliçi.
Kujtojmë që ditën e djeshme shoqëria civile së bashku me opozitë protestuan përballë Bashkisë së Tiranës ku kërkuan dorëheqjen e kryebashkiakut Erion Veliaj pas aferës “5D”, ku disa prej drejtorëve të kësaj Bashkie kishin përfituar miliona euro tendera nga kjo bashki apo institucione vartëse të saj me kompaninë e tyre “5D Konstruksion”, që sipas SPAK, pronarët “de facto” të saj ishin Mariglen Qato dhe Redi Molla.
