Është mbyllur java e 23-të e Kategorisë Superiore me dy ndeshjet e fundit Tirana-Erzeni e luajtur në “Air Albania” dhe Skënderbeu-Kukësi e luajtur në Korçë.
Shijakasit u konfirmuan edhe një herë si “macja e zezë” e bardhebluve për këtë sezon, duke u marr pikën e 7 në tre ndeshje. E sotmja u mbyll nël një barazim 1-1, ku Tirana dominoi sa i përket lojës, por e kishte të vështirë të konkretizonte rastet e krijuara.
Pas pjesës së parë të mbyllur pa gola, e dyta ishte tjetër histori. Erzeni kaloi në avantazh me Agim Zekën në minutën e 75-të, realizoi një gol fantastik me roveshatë, duke shfrytëzuar pasigurinë e portierit Abdullahu. Por vetëm 6 minuta më vonë, Kristal Abazaj vendosi baraspeshën që shtyu me kokë drejt rrjetës një krosim të Hoxhallarit.
Një pikë me shumë vlerë për Erzenin për mbijetesën, dy pikë të humbura për Tiranën që tashmë rrezikon edhe “Final Four”-in, pasi Dinamo, e cila fitoi një ditë më parë me Partizanin, renditet e pesta me vetëm tri pikë më pak.
Ndërkohë tek ndeshja tjetër, Skënderbeu u rikthye tek fitorja, duke mposhtur minimalisht 1-0 verilindorët.
Korçarët iu falën golit të shënuar nga Ermir Rashica në minutën e 6-të, pas një pakujdesie në zonë nga mbrojtja e Kukësit në një goditje nga këndi.
Kjo fitore e artë, e dërgon Skënderbeun në kuotën e 28 pikëve në vendin e shtatë, ndërsa Kukësi mbetet i fundit me 19 pikë.
