Këtë të shtunë, në orën 12:00, do të mbahet seanca e radhës në Gjykatën e Shkallës së Parë kundër Korrupsionit dhe Krimit të Organizuar ku do të jepet vendimi për ashpërsimin e masës së sigurisë ndaj kreut të PD-së, Sali Berisha për çështjen e privatizimit të ish-kompleksit “Partizani”.
Gjyqi është shtyrë tre herë me kërkesë të avokatëve të Berishës, Genc Gjokutaj dhe Sokol Mëngjesi, pasi kanë kërkuar për t’u njohur më shumë me provat, por edhe për shkak të kërkesave për përjashtimin e gjyqtares Irena Gjoka nga kjo çështje.
Në seancën e fundit të mbajtur ditën e enjte, gjyqi u shty për shkak se ata paralajmëruan se do të kërkonin sërish përjashtimin e Irena Gjokës, në lidhje me shkeljet e kryera në këtë proces, duke e akuzuar për njëanshmëri për mënyrën se si ajo kishte rrëzuar kërkesat e tyre.
Por, brenda orës 16:00 të ditës së djeshme, kur dhe përfundoi dhe afati tre ditor, ata nuk e depozituan kërkesën e radhës për përjashtimin e gjyqtares Irena Gjoka. Kjo gjë e konfirmuar edhe nga zyra e shtypit të Gjykatës së Posaçme, e cila ka pranuar se nuk iu ka shkuar asnjë kërkesë me shkrim për përjashtimin e gjyqtares.
Paraditen e të premtes, avokati Sokol Mëngjesi pranoi se u paraqit në GJKKO për të tërhequr vendimin e arsyetuar të gjyqtares Rudina Palloj, e cila rrëzoi kërkesën e tyre të mëparshme për përjashtimin e Irena Gjokës, pasi e gjeti atë të pabazuar në ligj. Por, sipas tij ky vendim nuk iu vendos në dispozicion.
Ai vendim do t’i bashëngjitej materialeve audio dhe vendimeve të mëparshme të gjyqtares Irena Gjoka, në kërkesën për përjashtimin e saj.
Avokatët Genc Gjokutaj dhe Sokol Mëngjesi e kanë kërkuar edhe më parë përjashtimin e gjyqtares Irena Gjoka, për njëanshmëri dhe konflikt interesi, pasi dorëzuan prova që sipas tyre faktojnë shkarkimin e gjyqtares në shkurt të 1996 nga Këshilli i Lartë i Drejtësisë, kur kryetar ishte Sali Berisha. Por ky vendim u rrëzua nga gjyqtarja Rudina Palloj, e cila u përcaktua nëpërmjet shortit për të marrë përsipër këtë rast.
SPAK ka kërkuar për ish-kryeministrin Sali Berisha vendosjen e masës së sigurisë “arrest në shtëpi” me mbikqyrje policore, ku do t’i ndalohen kontaktet me personat e tjerë, përveç se me familjarët që qëndrojnë në të njëjtën banesë. Në dokumentin e SPAK thuhet po ashtu se adresa ku Berisha do duhet të qëndrojë është adresa e shtëpisë në rrugën “Mustafa Matohiti”.
Pavarësisht se në këto seanca gjyqtarja Irena Gjoka ka thirrur dhe kreun e PD-së Sali Berisha, ai nuk është paraqitur, duke i paraqitur argumentet e tij përmes avokatëve.
Aktualisht GJKKO i ka caktuar Sali Berishës masën e sigurisë “detyrim paraqitje” si dhe “ndalim të daljes jashtë shtetit”. Megjithatë, Sali Berisha ka refuzuar që të parqaqitet në gjykatë të hënën e parë dhe të tretë të çdo muaji duke argumentuar se vendimi është antikushtetues, pasi nuk ishte marrë më parë autorizim për heqjen e imuniteti ndaj tij. Por SPAK i qëndroi mendimit se masa e sigurisë “detyrim paraqitje” si dhe “ndalim të daljes jashtë shtetit” ishin të një karakteri që konsiderohen kufizime dhe jo heqje lirie. Për këtë shkak SPAK ka kërkuar shtrëngimin e masës së sigurisë në “arrest shtëpi”.
Kujtojmë se Kuvendi më 21 Dhjetor miratoi kërkesën e SPAK me 75 vota pro të mazhorancës për heqjen e imuniteti të liderit demokrat. Vlen të theksohet fakti se edhe grupimi i Lulzim Bashës është pro arrestimit të Berishës, të cilët dorëzuan një raport në Kuvend, ku në disa pjesë ishte edhe më i ashpër me qëndrimet e mazhorancë, edhe pse ata munguan në seancën plenare të 21 dhjetorit.
Edhe pse e konsideron si një vendim politik të diktuar nga kryeministri Edi Rama, Berisha pritet ta respektojë vendimin nëse i caktohet masa e arrestit në shtëpi. Të paktën këtë ka lënë të nënkuptohet nga deklarat e tij në media.
Berisha akuzohet nga SPAK për kryerjen e veprës penale “Korrupsioni pasiv i funksionarëve të larte shteterore ose te zgjedhurve vendore, kryer në bashkëpunim. Ish-kryeministri i ka konsideruar akuzat ndaj tij dhe dhëndrit të tij Jamarbër Malltezi, si sulm politik, pasi sipas tij, nuk ka asnjë fakt dhe dokument që të ngrihen dyshimet mbi akuzat.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”. Ndërsa, për Jamarbër Malltezin dhe ndërtuesin Fatmir Bektashi, SPAK-u deklaron se ata kanë përfituar shuma të mëdha financiare nga tjetërsimi i truallit në ndërtime të larta.
