Më pak se 5 minuta zgjati seanca e seanca e sotme në Kuvend. Ashtu si në seancat e fundit, edhe këtë të hënë pati tensione që nisën pak pas orës 9:00, kur deputetë të opozitës hyjnë brenda ambienteve të Kuvendit.
Mes tyre dhe punonjësve të gardës pati përplasje. Shkak u bë kontrolli i shtuar në hyrje të institucionit nga punonjësit e gardës, gjë që nuk u pranua nga deputetët e opozitës.
Me hyrjen në sallë, deputetë të opozitës, pavarësisht pranisë së gardës, kthyen përmbys disa karrige para foltores së Kuvendit. Ndërkohë, kordoni i krijuar nga gardistët, që ndau deputetët në njërën anë dhe ministrat, kryeministrin dhe kryeparlamentaren në anën tjetër, ishte i njëjnë si në seancat e zhvilluar gjatë javëve të fundit.
Pavarësisht kontrolleve në hyrje të parlamentit, demokratët kishin arritur të fuste tymuese në sallë, që i ndezi fillimisht Flamur Noka fill pas nisjes së seancës, duke e mbushur ambientin me tym. Pas kësaj, kryeparlamentarja Linda Nikolla njoftoi përjashtimin e tij nga seanca.
Ndërkohë në një moment, mori flakë një nga pajisjet folëse si pasojë e një fladani të ndezur nga një prej ligjëvënsve demokratë, që u shua më pas nga punoës së gardës dhe deputetë.
Në kushtet e një kaosi në sallë, Lindita Nikolla shmangu diskutimet siç parashikoheshin në rendin e ditës dhe kaloi menjëherë në votim projektligjet, mes tyre dhe votimi në parim i buxheti për vitin 2024. Projekligjet morën miratimin e 73 ligjëvënsve socialistë dhe menjëherë pas kësaj, Nikolla urdhëroi mbylljen e seancës plenare.
Reagimet
Pas seancës, në një prononcim për gazetarët, Berisha e quajti votimin e buxhetit antikushtetues.
“Ju e patë vetë skenën më të shëmtuar në historinë 32-vjeçare të parlamentit. Ju e patë vetë se si banorët e fermës së Edi Ramës, lexo Xhorxh Oruellit, kaluan brenda 5 minutash, aktin themelor të vitit, buxhetin e shtetit. E kaluan në mënyrë antikushtetuese, antiligjore, sepse ky buxhet erdhi këtu jo mbi bazën e procedurave që përcakton Kushtetuta dhe rregullorja e Kuvendit, por erdhi si një proces klandestin, i zhvilluar në mejhane me ahengje dhe në mënyrë të paparë. Kështu siç nisi, ne erdhëm këtu për të bllokuar procesin, në mënyrë që buxheti, akt themelor i vitit në parlament, të merrte të gjithë dimensionet që i takonin, por ata e kaluan atë brenda 7 minutash, në frikë dhe tmerr. E votuan, por nuk votoi askush, nuk ka asnjë evidencë për votimin, as për ndonjë gjë tjetër, përveç cicërimit si papagall të shërbëtores së Edi Ramës, Lindita Nikollës”, tha Berisha.
“Kjo dëshmon drejtësinë e betejës pa kthim të opozitës, e cila edhe sot korri një fitore në betejën e saj pa kthim, pasi u bëri të pamundur hajdutëve të mbrojnë vjedhjen e tyre të mashtrojnë shqiptarët me vjedhjen e tyre. I bëri të pamundur Edi Ramës të ligjërojë për buxhetin e vjedhjes më të madhe në histori, buxhetin e gjobës më të madhe ndaj shqiptarëve. Beteja pa kthim e opozitës vazhdon”, shtoi ai.
Ndërkohë gjatë një fjale të mbjatur brenda seancës, e transmetuar në faqen e tij në “Fb”, Berisha hodhi akuza dhe ndaj ministrave të qeverisë Rama, ndërsa paralajmëroi se data e protestave po afron.
Kreu i grupit parlamentar të PD-Gazment Bardhi hodhi akuza ndaj kryeministrit Edi Rama dhe kryeparlamentares Lindita Nikolla.
“4 minuta e 29 sekonda seancë për miratimin e buxhetit të shteti në një sallë të mbushur me Gardën, para se të më pyesni mua a është kjo beteja, ju duhet t’i kërkoni llogari kryetares së Kuvendit pse gënjeu të shtunën kur mohoi urdhrin e paligjshëm të mbushjes së sallës me punonjësit e Gardës së Republikës. E vetmja arsye pse sot salla ishte mbushur me forcat speciale të Gardës ishte sepse sot në Kuvend ishte paraqitur kryehajduti Edi Rama, një frikacak që për të ardhur në seancë plenare, kishte mbushur sallën me punonjës sigurie. Pa asnjë diskutim që opozita do të dëshironte që kjo seancë të ishte normale, të shkëmbenim ide, mirëpo kjo është e pamundur sa kohë shkelet rregullorja e Kuvendit dhe Kushtetuta e Shqipërisë. Sipas ligjit, Garda nuk mund të futet për të rrethuar deputetët”, tha Bardhi
“Beteja jonë do të vazhdojë, ne nuk do lejojmë punimet normale të Kuvendit, sa kohë nuk lejohemi të bëjmë komisionet hetimore”, theksoi.
“Ne nuk jemi lodhur, nuk jemi dorëzuar, kjo që patë sot është hapi i radhës”, përfundoi ai.
Nga kampi tjetër, Bledi Çuçi, kreu i grupit parlamentar të PS-së, dënoi veprimet e opozitës. Ai përsëriti se komisionet parlamentare hetimore të kërkuara nga opozita janë refuzuar nga maozhoraca në pëpruthje me parashikimet kushtetuese.
Prej javësh tashmë, deputetët demokratë janë angazhuar në bllokimin e punimeve të Kuvendit pasi shprehen se të drejtat e tyre po shtypen nga mazhoranca. Këtë të Hënë, kreu i PD Berisha u shpreh se beteja e tyre është “pakthim”.
“Beteja jonë nisi për këto arsye; së pari mohimin e të drejtës kushtetuese për komisionet parlamentare hetimore. Së dyti, mohimin e të drejtës legjislative duke mos sjellë në parlament 32 ligje, rezoluta dhe amendamente të opozitës. Së treti, nisi për mohimin e të drejtës së opozitës për të zgjedhur përfaqësuesit e vet, por për të bërë të gjithë lojën me përfaqësues të zgjedhur nga Rama. Së katërti, ministra, Edi Rama nuk paraqiten në interpelanca siç përcaktohet. Pra, deputetët e opozitës nisën betejën e tyre pa kthim, pasi defakto janë këtu pa të drejta dhe këto të drejta nuk janë të tyre personale, por janë të popullit opozitar, janë vetoja që Kushtetuta i jep popullit opozitar për kontrollin nëpërmjet komisioneve”, tha kryedemokrati.
