Policia ka arrestuar ditën e sotme shoferin dhe pronarin e furgonit të linjës Ankona-Durrës, pasi janë kapur me mallra kontrabande në hyrje të RSh-së.
Mësohet se në pranga ka rënë shoferi, Florjan Goga dhe pronari Agron Çela pasi akuzohen për veprat penale “Kontrabanda me mallra për të cilat paguhet akcizë” dhe “Kontrabanda me mallra të tjera”, kryer në bashkëpunim.
Nga kontrollet e policisë janë gjetur dhe sekuestruar, dhjetëra kuti me kafe dhe mallra të tjera, të cilat këta shtetas po tentonin t’i kontrabandonin në vendin tonë.
“U arrestuan në flagrancë, për veprat penale “Kontrabanda me mallra për të cilat paguhet akcizë” dhe “Kontrabanda me mallra të tjera”, kryer në bashkëpunim, shtetasit:
-G., 26 vjeç, banues në Dimal (drejtuesi i automjetit);
– Ç., 60 vjeç, banues në Lushnjë (pronari i automjetit).
Shërbimet e Policisë Kufitare në PKK Port Durrës, në hyrje të RSh-së, gjatë kontrollit të ushtruar në bashkëpunim me autoritetet doganore, në automjetin (furgonin) me drejtues shtetasin F. G. dhe pronar shtetasin A. Ç., gjetën dhe sekuestruan dhjetëra kuti me kafe dhe mallra të tjera, të cilat këta shtetas po tentonin t’i kontrabandonin në vendin tonë”,- njofton Policia.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
