Dalin detaje të reja nga plagosja me armë zjarri e ndodhur mesditën e sotme pranë një gjimnazi në qytetin e Laçit.
Për ngjarjen e rëndë ka reaguar edhe policia e shtetit e cila bën me dije se një sherr mes adoleshentëve ka degjeneruar në përdorimin e armës së zjarrit. Për pasojë 15-vjeçari me iniciale L. Rr, ka mbetur i plagosur në këmbë dhe është transportuar në spital ku ndodhet jashtë rrezikut për jetën.
Shërbimet e Policisë po vijojnë kontrollet me qëllim lokalizimin e kapjen e autorit.
“Rreth orës 12:20, në lagjen nr.4 në Laç, jashtë rrethimit të gjimnazit, pas një konflikti të çastit për motive të dobëta, është plagosur me armë zjarri në këmbë shtetasi i mitur L. Rr. 15 vjeç, nxënës në gjimnaz, banues në Kurbin, i cili është transportuar në spital ku ndodhet jashtë rrezikut për jetën. Menjëherë me marrjen e njoftimit, shërbimet e policisë kanë shkuar në vendin e ngjarjes dhe falë veprimeve të shpejta hetimore, kanë identifikuar autorin e dyshuar shtetasin A.Gj. 17 vjeç, gjithashtu nxënës i gjimnazit”, njofton policia e Kurbinit.
Grupi hetimor nën drejtimin e prokurorit, njëkohësisht vazhdon veprimet hetimore në vendin e ngjarjes për zbardhjen e plotë të rrethanave të ngjarjes.
