Nga Boldnews.al
Bashkia e Elbasanit, nëpërmjet ndërmarrjes së Ujësjellësit të qytetit, ka aplikuar prej vitesh një skemë abuzive të ngjashme me inceneratorin fantazëm-qytetarët paguajnë tarifë për përpunimin e ujërave të ndotur, ndërkohë që nuk ekziston një impiant i tillë.
Administratori i Shoqërisë Rajonale të Ujësjellës-Kanalizimeve Elbasan, Luan Tabaku, pranon zyrtarisht se “ndërtimi i Impiantit të Trajtimit të Ujërave të Ndotur-ITUN është pjesë e planeve afatgjata” të kompanisë publike dhe se “ngritja e tij do të realizohet pas hartimit të studimit të fizibilitetit dhe projektit që do t’i japë zgjidhje përfundimtare problemit”.
Tabaku thotë se banorët e qytetit faturohen njëlloj, si për ujin e pijshëm, ashtu edhe për largimin dhe trajtimin e ujërave të ndotur. Sipas tij, ky faturim është një detyrim që rrjedh nga në një vendim të Entit Rregullator të Ujit (ERRU), miratuar në vitin 2025.
Megjithatë, Administratori Luan Tabaku shmang faktin se vendimi i ERRU, datë 1 Korrik 2025, është miratuar pas propozimit të dërguar nga Shoqëria e Ujësjellës-Kanalizime të Elbasanit, mbështetur nga bashkia e drejtuar nga Gledjan Llatja.
Rreth një vit më parë, Ujësjellësi i Elbasanit i propozoi Entit Rregullator të Ujit rritjen e tarifave për “furnizimin me ujin e pijshëm dhe pastrimin e përpunimin e ujërave të ndotur”.
Në atë kërkesë, Ujësjellësi i Elbasanit argumentonte se Shoqëria Rajonale tashmë kishte brenda saj edhe ish-strukturat e ngjashme të bashkive të qarkut, përfshirë Librazhdin, Prrenjasin dhe Peqinin dhe se ky riorganizim institucional kërkonte një menaxhim më të madh dhe, rrjedhimisht, edhe tarifa më të larta.
Enti Rregullator i Ujit e pranoi kërkesën e Shoqërisë Rajonale të Ujësjellës-Kanalizime Elbasan, të drejtuar nga Tabaku. Sipas vendimi të korrikut 2025, qytetarëve të Elbasanit u shtohej me 30 përqind çmimi për metër/kub ujë të pijshëm, si edhe u dyfishohej tarifa për shërbimin për ujërat e ndotur.
Tarifa për ujërat e ndotur është konsideruar tërësisht abuzive nga drejtuesit lokalë të Partisë Demokratike në Elbasan. Kryetari i degës, Alis Narazani, deklaroi në një konferencë për media se “bëhet fjalë për abuzimin me faturimin e ujit, për tarifat e padrejta që u vendosen qytetarëve dhe për dështimin e Bashkisë Elbasan në mbikëqyrjen e fondeve publike dhe të taksave të qytetarëve të Elbasanit”.
Ndërsa kryetarja e grupit të këshilltarëve në Këshillin Bashkiak të Elbasanit, Bianka Çopja, dha detaje më të zgjeruara mbi atë që e konsideroi si “vjedhje e hapur për një shërbim që nuk ekziston!”.
E shoqëruar edhe nga këshilltari opozitar, Zmir Muzhaqi, zonja Çopja tha se “Ndërmarrja e ujësjellësit sapo ka pranuar zyrtarisht dhe me shkrim se qyteti i Elbasanit nuk ka një Impiant të Trajtimit të Ujërave të Ndotura (ITUN). Impianti, sipas tyre, qenka thjesht një “plan afatgjatë”, një projekt në letër, një ëndërr në sirtar!”.
Duke iu referuar një komunikimi shkresor me Ujësjellësin e Elbasanit, këshilltarja Çopja kishte një pyetje të drejtëpërdrejtë për kryebashkiakun, Gledjan Llatja.
“Nëse Elbasani nuk ka impiant, nëse ujërat e ndotura nuk trajtohen dhe nuk pastrohen, përse qytetarët vazhdojnë të paguajnë tarifë kanalizimi dhe trajtimi çdo muaj?!”
Natyrisht, Çopja nuk shpreson në një përgjigje nga Llatja, pasi ai, edhe herë të tjera, ka refuzuar të bëjë transparencë për projektet e Bashkisë dhe ata të dy po përballen në një proces gjyqësor që ka nisur në Gjykatën Administrative të Tiranës, pikërisht, për të detyruar kreun vendor që të japë informacionin e kërkuar.
Sa i përket tarifës së pastrimit dhe përpunimit të ujërave të ndotur, Bianka Çopja vijoi më tej: “Po paguajmë për një shërbim fantazmë! Po paguajmë për tuba të shtruar që në kohën e komunizmit, të cilët nuk kanë parë asnjë investim real. Përgjigjja e tyre thotë se paratë tuaja mblidhen për të krijuar “një fond rezervë” për investime të ardhshme. Kjo është e paligjshme dhe e pamoralshme! Ju nuk mund t’u merrni lekët sot qytetarëve për një shërbim që mbase do t’ua ofroni pas 10 apo 20 vitesh!”.
