Nga Boldnews.al
Në kohën kur Rama duartrokiste vallen që shfaqej para liderëve të BE-së, pak metra më larg në protestën e opozitës një person grushtoi në fytyrë kreun e PD-së Sali Berisha. Agresori është Gerti Shehu, 31-vjeçar i lindur në Krastë të Tepelenës dhe banues në Tiranë. Pas ndalimit policia rendi të dilte në përfundimin se ai ishte me probleme të shëndetit mendor, duke iu referuar jo një kartele të dalë nga komisioni ligjor i mjekëve psikiatër, por nga një klinikë private.
Gjithçka mund të jetë. Ndoshta nën efektin e narkotikëve, ndoshta i trullosur në mendje, ndoshta i yshtur nga “të mençur” që shfrytëzojnë një individ. Të gjitha mund të qëndrojnë, por ajo që nuk ka asnjë medyshje është se grushti erdhi nga pushteti i çmendur.
Ka më shumë se tre javë që gojët e Rilindjes së pushtetit flasin se protesta e opozitës është yshtur nga lobet ruse, nga agjenturat e huaja dashakeqe të Shqipërisë, apo se Berisha është njeriu antikombëtar që nuk lejon “ndriçimin e madh të qeverisë”.
Kushdo mund të çmendet nga këto deklarata. Kushdo mund të bëhet viktimë e një propagande që mbjell urrejtje, që përçon dhunë me në krye një qeverisje haluçinative që po çmend këdo, edhe patronazhistët që u erren sytë kur mësojnë se fqinji ka bindje të ndryshme nga ai dhe nuk voton për pushtetin socialist.
Çmenduri e madhe pushtetimi është që të degdisësh jashtë vendit mbi 700 mijë të rinj dhe të reja. Çmenduri pa kufi është të shohesh sesi emigrantët palosen në gomonet e trafikantëve ku mes rrezikut për jetën tentojnë të kalojnë nga Franca në Angli. Çmenduri është që të kesh nën kontroll Policinë e Shtetit, duke e kthyer uniformën e tyre si bluzat fushatore të socialistëve. Marrinë e madhe deri në çmunduri pa rikuperim është shantazhi ndaj medias që ka vetëm dy rrugë: tritolin e qeverisë nëse del kundër dhe shukat e korrupsionit nëse i lëpihesh.
Duke dëgjuar Ramën se 6 dhjetori është dita më e madhe e historisë sonë, ku që nga sot “deti do bëhet kos”, që Europa ka përzgjedhur qeverinë tonë si “misionaren” e Ballkanit Perëndimor, por Berisha nuk po e lejonte dhe po bënte pis festën e madhe, kushdo ka të drejtë të çmendet. Grushti erdhi nga qeverisja e tërbuar që marrosi me gjuhën e urrejtjes një individ, i cili me grushtat e tij përçoi frymën qeverisëse.
