Vetëm 3 ditë pas përmbytjeve në vend, kryeministri Edi Rama zgjodhi të zbriste në terren.
Ai u shfaq këtë të Martë në Shkodër, tek Harku i Bërdicës, nga ku akuzoi mediat lidhur me raportimet për përmbytjet. Rama tha se është shtrembërimi i qëllimshëm që i bëhet situatës në media.
I shoqëruar nga Elisa Spiropali, të dy duket se u kujdesën më shumë që të sulmonin mediet që kanë raportuar për përmbytjet dhe akuzat e opozitës për hapjen e kaskadave, sesa vetë përmbytjet.
Po ashtu, bëri një krahasim me përmbytjet në kohën e qeverisjes së PD-së, plotë 12 vite më parë.
“Nga informacioni që mora unë para një ore, do ketë sërish reshje të tjera, fillojnë nga mesnata dhe vazhdojnë prapë gjatë natës, do ketë pak problem. Por ajo që është për të vënë duart në kokë, është shtrembërimi i qëllimshëm që i bëhet situatës nëpër kanale, nëpër portale, një tërbim edhe një kombinim i padijes me ligësinë që këtu është bërë një kiamet i madh, ndërkohë që krahasuar me të pakrahasueshmen në fakt të 2010-ës, është një situatë e paimagjinueshme domethënë, s’ka krahasim”, tha Rama.
Përmbytjet sollën dëme të mëdha materiale për shumë familje në Shkodër e Lezhë dhe të tjera zona. Vetë banorët e prekur janë shprehur për mediat se nuk janë lajmëruar nga autoritetet, ndërsa tregojnë se dëmet materiale që u janë shkaktuar janë të mëdha. Në Lezhë ka ende prani uji në 4 banesa, raportuan këtë të Martë “Emergencat Civile”.
Përveç kësaj, përmbytjet shkaktuan edhe dy viktima në Malësinë e Shkodrës, ku babë e bir humbën jetën në Bogë, pasi mjetin me të cilin lëviznin e mori rrjedha e përroit.
Mësimi u ndërpre në dhjetëra shkolla në veri të vendit. Po ashtu, u raportuan probleme me energjinë elektrike dhe kalueshmërinë në akset rrugore. Probleme këto që ende vijojnë në disa zona.
Opozita akuzoi se përmbytja në zonën e Shkodrës erdhi nga keqmenaxhimi i kaskadave. Akuzat u mohuan nga kryeministri Edi Rama.
