Deputeti dhe kreu i Këshillit Kombëtar të PD-së, Edi Paloka ka folur në emisionin “Kjo javë”, në News24 për aksionin opozitar. Ai tha se do ketë protesta me një simbolikë të caktuar, apo dhe protesta të mëdha. Sa iu përket këtyre të fundit, Paloka paralajmëroi se nuk do jenë thjesht një shëtitje në bulevard.
“Protestat janë pjesë e kësaj strategjie. Dhe gjatë verës ne kemi qenë, 7 korriku ishte një provë folëse për opozitën. Unë kam qenë nga ata që i kam thënë Berishës mos ta bëjë këtë protestë, rezultoi që shqiptarëve iu ka vajtur aty ku nuk mban. Tani është më shumë se koha optimale. Për fat të keq gjërat po shkojnë gjithnjë e më zi. Shihni çfarë po ndodh me ekonominë.
Një rini që ikën përditë, kushtet që përkeqësohen. Energjia elektrike që ky zotëria lajmëron se do shkojë çmimi në stratosferë, me gjithë ky zotëria e di që ne nuk kemi asnjë lidhje.
Protestat e mëdha nuk do jenë thjesht një shëtitje në bulevard. Në qoftë se ne do ndërmarrim protesta më të mëdha, do kenë një skenar tjetër. Nuk do jenë shëtitje në bulevard dhe kthim në shtëpi pa arritur asgjë.
Protestat e mëdha do kenë një synim për të arritur një qëllim. Protesta e 7 korrikut kishte dhe ajo qëllimin e saj, e tregoi, që në një kohë kaq të vështirë, në fillim korriku, shqiptarët treguan se kanë arritur në një pikë që nuk mban më”, tha Paloka.
Ai deklaroi synimi i parë janë zgjedhjet lokale.
“Ne synojmë si opozitë zgjedhjet lokale. A do ketë protesta të mëdha gjatë kësaj kohe? Do jenë në një tjetër funksion, në funksion të rrëzimit të qeverisë. Zgjedhjet janë hapi i parë.
Askush nuk beson që Rama nuk do t’i zhysë duart prapë në zgjedhje. Rama do t’i fusë duart e tij të pista nuk ka dyshim njeri. Si do reagojmë ne është tjetër gjë. Ne do bëjmë çdo gjë për ta amortizuar këtë ndërhyrje të Ramës dhe për të fituar zgjedhjet.
Sigurisht pas kësaj do ketë një reagim. Ta ketë të qartë Rama pas zgjedhjeve lokale do ikë ai në shtëpi, me të mirat dhe këqijat.
Ne e kemi të qartë që sot që Rama do ndërhyjë në zgjedhje. Këto janë mënyrat që ne do përdorim, sipas momentit, sipas situatës. Rama ka përballë njerëz që nuk kthehen nga rruga”, deklaroi Paloka.
