Kreu i PD, Sali Berisha, u shpreh në emisionin Open, se do të përdoren të gjitha metodat e mosbindjes civile, për ti rikthyer shqiptarëve votën e lirë.
Berisha tha se beteja për votën e lirë të shqiptarëve është njëlloj si betejat “për jetë a vdekje”.
Kreu i PD tha se e konsideron Edi Ramën armik për shkak të vjedhjeve të përditshme që bën, ndërsa shtoi se tradhëtia më e madhe e Lulzim Bashës ishte pikërisht ajo ndaj votës së lirë.
Berisha tha se qëndrimet që mbajti Palmer dhe Yuri Kim pas zgjedhjeve të 25 prillit, duke mos pritur as anikimet , kalojnë çdo cak, ndaj edhe unë i kam dënuar.
“Kur dolën përgjimet e Bild nisën protestat, por Lulzim Bashës i binin kumuriat dhe bilbilat, ndaj edhe ai i hoqi fare.
Djegia e mandateve ishte tërësisht e gabuar. Lulzim Basha mendonte se me djegien e mandateve do të polarizonte shoqërinë dhe i kam thënë që kjo mund të na çojë në fitore, por edhe drejt katasfrofës, pasi ndërkombëtarët nuk do të na mbështesnin”, tha Berisha.
I pyetur nëse protesta e 7 korrikut ishte organizimi i një akti force përballë vetë Partisë Demokratike, Berisha tha se qëllimi i vetëm ishte Edi Rama.
Ai vlerësoi maksimalisht pjesëmarrjen në tubimin përpara Kryeministrisë duke theksuar se nuk i priste aq mbështetës në shesh, dhe për më tepër atë nivel pjesëmarrje nga rinia e vendit.
“S’kishte të bënte në mënyrë absolute me askënd tjetër, përveçse Edi Ramën. mendoj se si protestë ishte pa dyshim jashtë parashikimeve të mia, sepse koha në të cilën e thirra, në kushtet më të vështira që kam thirr ndonjëherë protestë, por koha kushtet duhet t’i pranojë nuk duhet t’i shmangë. Edhe po të vinte gjysma e tyre unë do t’i përulesha me nderim më të madh.
Aty erdhën ndoshta në protestën më të madhe në 30 vite. Unë dy mbaj mend më të mëdha. Mbaj mend të dytën “Nano ik” dhe këtë. Kësaj here edhe sot më kanë ardhur njerëz në zyrë dhe më kanë thënë ne ishim te bashkia. Dhe i thash a dëgjonit.
Më tha po, akustika ishte shumë e mirë. Kjo tejkaloi çdo lloj parashikimi dhe kishte një specifik tjetër shumë pozitive, pra dominohej nga të rinjtë. Së dyti s’mund të kishte asnjë qëllim tjetër përveç Edi Ramës dhe unë në gjithë karrierën politike e shpall kundërshtarin për herë të parë në jetën time armik”, tha ai.
