Partia Demokratike dhe shoqëria civile kanë thirrur më 7 korrik, ora 19:00, një protestë para godinës së Kryeinistrisë, e pra kjo që nga momenti që drejtimin e forcës më të madhe opozitare në vend e ka marrë ish-Kryeministri Sali Berisha.
Nga raportimet mësohet se të paktën 1200 policë, efektivë të komisariateve dhe FNSH, si dhe agjentë civilë, pritet të jenë në terren, të përqëndruar kryesisht pranë Ministrisë së Brendshme dhe godinës së qeverisë.
Policia ka parashikuar kordonin e efektivëve në dyert e Kryeministrisë ndërsa pikat e larta të objekteve të rëndësisë së veçantë në Bulevardin Dëshmorët e Kombit do të ruhen nga forcat speciale. Një pjesë e segmenteve pritet të bllokohen pjesërisht nga policia rrugore.
Për protestuesit që vijnë nga sheshi Skënderbej, Policia do të sigurojë rrugëkalimin për ta duke bllokuar pjesërisht Bulevardin Dëshmorët e Kombit deri te Kreyministria. Për ata që vijnë nga Rruga e Elbasanit do të ketë kufizime gjithashtu ndërsa do të sigurohet lëvizja e lirë e protestuesve nga selia e partisë demokratike deri në dyert e Kryeministrisë.
Prej disa ditësh strukturat e PD-së kanë bërë thirrje që protestuesit të marrin dhe fëmijët e tyre në atë që quhet Shqipëria në rrezik.
Kreu i PD, Sali Berisha, ka shprehur bindjen se pjesëmarrja në protestën e nesërme do të jetë masive, teksa një paralajmërim e ka edhe për Policinë e Shtetit.
“Paralajmëroj të gjithë llojet e policive se çdo presion, çdo qëndrim, çdo përpjekje për të intimiduar, për të dhunuar, për të penguar popullin opozitar do të regjistrohet dhe do të marrë ndëshkim personal të merituar ligjor. Paralajmëroj të mos provokojnë protestuesit. Edi Rama është i ftuar të mendojë dorëheqjen e tij sa më parë”, tha ai.
Ndërkohë që populli opozitar do të protestojë para godinës së Kryeministrisë, Edi Rama ka zgjedhur të jetë në Vlorë.
Në orën 19:00, ai ka zgjedhur të inaugurojë By-Pass në këtë qytet, duke shmangur në këtë mënyrë qëndrimin në Tiranë.
