Parlamenti Europian ka rikthyer vëmendjen te një nga çështjet kryesore të ngritura gjatë protestave që po zhvillohen në Tiranë, mbrojtja e zonave të mbrojtura në Shqipëri, me fokus të veçantë te zona e mbrojtur e Vjosë-Nartës, pjesë e së cilës është edhe Zvërneci.
Përmes një amendamenti të miratuar sot, Parlamenti Europian u bën thirrje autoriteteve shqiptare të vendosin menjëherë një moratorium për procedurat e reja të lejeve, punimet e ndërtimit dhe ndërhyrjet zhvillimore në zonat e mbrojtura, derisa të shfuqizohen dispozitat e kontestuara të ligjit për Zonat e Mbrojtura dhe të garantohet përputhja e plotë me standardet e Bashkimit Europian për mbrojtjen e natyrës.
Amendamenti, i propozuar nga Grupi i të Gjelbërve, kërkon gjithashtu që çdo projekt në këto zona t’i nënshtrohet vlerësimeve të plota të ndikimit në mjedis dhe proceseve transparente të konsultimit publik me komunitetet lokale, ekspertët dhe shoqërinë civile.
Ndërkohë, Parlamenti Europian rrëzoi një amendament tjetër që përmendte drejtpërdrejt biznesmenin amerikan Jared Kushner dhe kompaninë Affinity Partners në lidhje me zhvillimin e një projekti turistik në ishullin e Sazanit dhe në zonën e mbrojtur Vjosë-Nartë. Amendamenti i rrëzuar përfshinte gjithashtu një thirrje për mbështetjen e hetimeve të nisura nga SPAK në lidhje me këtë projekt.
Amendamenti i miratuar
46a. Shpreh shqetësim serioz se zhvillimet e vazhdueshme brenda zonës së mbrojtur Vjosa-Narta tregojnë pasojat praktike të ndryshimeve të fundit ligjore dhe rreziqet që ato paraqesin për zonat me vlera të njohura ekologjike; ndjek nga afër protestat paqësore që po zhvillohen në lidhje me këtë çështje; u bën thirrje autoriteteve shqiptare të vendosin menjëherë një moratorium për të gjitha procedurat e reja të lejeve, punimet e ndërtimit dhe ndërhyrjet zhvillimore brenda zonave të mbrojtura, derisa dispozitat e papajtueshme të ligjit të ndryshuar për Zonat e Mbrojtura të jenë shfuqizuar, bazuar në një kërkesë të kahershme të Komisionit Europian dhe Parlamentit Europian dhe në përputhje me standardet përmbyllëse të Kapitullit 27, si edhe derisa të garantohet përputhshmëria e plotë me standardet e Bashkimit Evropian për mbrojtjen e natyrës; thekson se çdo projekt në këtë zonë duhet t’i nënshtrohet vlerësimeve gjithëpërfshirëse të ndikimit në mjedis, plotësisht në përputhje me standardet e BE-së, duke përfshirë një proces transparent të pjesëmarrjes publike me komunitetet lokale, shkencëtarët dhe shoqërinë civile.
Amendamenti i rrëzuar
Shpreh shqetësime, për rrjedhojë, lidhur me marrëveshjen e qeverisë me Jared Kushner dhe kompaninë Affinity Partners për zhvillimin e një projekti resorti luksoz në ishullin e Sazanit dhe në zonën e mbrojtur Vjosa-Nartë; bën thirrje për mbështetjen e hetimit kundër korrupsionit që aktualisht po zhvillohet nga SPAK në këtë kontekst; kërkon që e drejta për të protestuar në mënyrë paqësore të garantohet dhe të mbrohet nga shtypja ose pengimi prej kompanive private të sigurisë, siç ndodhi gjatë përplasjeve që ndodhën në fund të majit 2026. /Monitor
