Kryeministri i Shqipërisë Edi Rama zhvilloi një takim në Zvërnec të Vlorës, ku në fokus ishte projekti i resortit luksoz që pritet të ndërtohet në zonë.
Takimi u mbajt në një kohë kur në Tiranë dhe qytete të tjera kishin nisur protesta kundër projektit, ndërsa mungesa e përballjes direkte me tubimet e qytetarëve në kryeqytet është një tregues i shmangies së debatit me të rinjtë në shesh.
Gjatë takimit, Rama ka përdorur herë pas here tone ironike dhe ka ndërhyrë në diskutimet e qytetarëve, duke u ndërprerë fjalën disa prej tyre dhe duke i marrë mikrofonin një qytetari gjatë replikeve në sallë.
“Luftë hibride” dhe akuza për Iranin
Gjatë fjalës së tij, Rama deklaroi se Shqipëria prej vitesh është objekt i një fushate të organizuar ndikimi nga Irani, të cilën ai e cilësoi si “luftë hibride”.
Sipas tij, në periudhën e protestave dhe debateve të fundit, është vërejtur një rritje e madhe e aktivitetit në rrjetet sociale që lidhet me Shqipërinë, duke pretenduar se janë përdorur edhe materiale të krijuara me inteligjencë artificiale për të përhapur narrativë të rreme.
Ai përmendi gjithashtu se, sipas tij, është ndërtuar një fushatë e koordinuar për të krijuar panik rreth idesë se në Shqipëri do të vijnë palestinezë, duke e lidhur këtë me struktura të caktuara dhe ndikime në hapësira fetare.
Rama e interpretoi këtë si një sulm ndaj reputacionit të vendit dhe historisë së bashkëjetesës fetare në Shqipëri, duke e konsideruar si përpjekje për të dëmtuar imazhin ndërkombëtar të vendit.
Ironia ndaj protestave dhe “5 kushteve”
Në një tjetër moment të fjalës së tij, kryeministri ironizoi kërkesat e protestuesve që kanë artikuluar “5 kushte”, mes tyre edhe dorëheqjen e qeverisë.
“Po mirë, po të jap dorëheqjen, si i bëj katër të tjerat?”, u shpreh ai, duke e cilësuar kërkesën si të pazbatueshme në logjikën e tij.
Rama këmbënguli se investimi në Zvërnec është i qartë dhe i mbështetur në procedura ligjore, duke theksuar se pretendimet për parregullsi janë të pasakta ose të keqinterpretuara.
Deklarata për gjykatat: Fuqia ime mbaron aty
Një pjesë e debatit u përqendrua edhe te sistemi i drejtësisë, ku Rama u shpreh se pushteti i tij si kryeministër nuk shkon përtej vendimeve gjyqësore.
Në një ton ironik dhe të ashpër, ai reagoi ndaj thirrjeve për ndërhyrje në drejtësi, duke deklaruar se vendimmarrja i takon gjykatave dhe jo ekzekutivit.
“Do më bësh mua të shaj gjykatën? Se gati jam. Po do më prishësh punë me Europën. Gati jam të të bashkohem. Hajde bëhemi bashkë, i gjejmë shtëpinë gjykatësit dhe e kapim të dy bashkë. Demokraci është kjo?
Fuqia ime si kryeministër mbaron aty ku fillon fuqia e gjykatës. Mos më bëj mua të merremi këtu me gjykatën, se vijnë ata dhe na kapin të dyve pastaj”, tha Rama.
“Nuk negocioj” dhe mesazhi ndaj protestave
Në takimin në Zvërnec, Rama theksoi se nuk do të negociojë për projektin, por është i hapur për të diskutuar.
Ai u shpreh se edhe nëse qindra mijë qytetarë do të protestonin, kjo nuk do të ndryshonte vendimin për investimin, duke e lidhur projektin me marrëveshje dhe zhvillim ekonomik.
“E thashë edhe atë ditë: ‘Kush do të flasë?’, thatë: ‘Jo ne nuk negociojmë’. Jam unë i pari që nuk negocioj, se s’kam çfarë të negocioj me askënd. Por për të folur nuk diskutohet.
I thashë Brunës, mos më merr njerëz nga Vlora. S’kam frikë të përballem me asnjë njeri. Ata nuk më bëjnë të ndryshoj mendim dhe më shtojnë jetën. Këta që duhan të më heqin do të duhet të presin shumë më tepër”, tha Rama.
Përplasjet me qytetarët në sallë
Takimi nuk ka kaluar pa tensione. Rama ka ndërprerë disa herë qytetarët gjatë fjalës së tyre, duke u kërkuar të mos e zgjatnin diskutimin ose duke i ndërhyrë në replika.
Në disa raste, ai ka reaguar me tone ironike ndaj komenteve të banorëve, përfshirë edhe një moment kur një qytetar u prezantua si nga Labëria dhe se mund të përdorte ton më të lartë në diskutim, ndërsa Rama iu përgjigj me batutë për pamjen e tij.
“Dukesh nga pantallonat” i tha Rama.
Protestat në Tiranë dhe zgjerimi në qytete
Në të njëjtën kohë me takimin në Vlorë, në Tiranë vijojnë protestat kundër projektit të Zvërnecit. Organizatorët kanë artikuluar kërkesa të forta për anulimin e investimit dhe dorëheqje të qeverisë.
Protestat nuk janë kufizuar vetëm në kryeqytet, por kanë gjetur jehonë edhe në qytete të tjera si Korça, Elbasani dhe Durrësi, ku grupe qytetarësh kanë shprehur solidaritet me lëvizjen në Tiranë.
Në bulevardin “Dëshmorët e Kombit”, protestuesit kanë vijuar tubimet për disa ditë rresht, duke kërkuar transparencë mbi projektin dhe procesin e vendimmarrjes.
Përplasja mes natyrës dhe investimeve strategjike
Debati për resortin në Zvërnec po kthehet gjithnjë e më shumë në një vijë të fortë ndarjeje mes dy botëve: asaj që qeveria e sheh si zhvillim strategjik dhe motor ekonomik për zonën, dhe asaj që protestuesit e lexojnë si cenim të natyrës dhe mungesë transparence në vendimmarrje.
Në njërën anë vendosen premtimet për investime dhe rritje ekonomike, në tjetrën shqetësimet për shkatërrimin e ekosistemit dhe humbjen e karakterit të një prej zonave më të ndjeshme bregdetare në vend./Boldnews
