Gjykata e Lartë ka rrëzuar këtë të enjte, rekursin e kryebashkiakut të arrestuar të Tiranës, Erion Veliajt, për masën e sigurisë, duke e lënë atë në burg.
Rekursi i Veliajt ishte depozituar më 6 maj, vetëm 2 ditë pas vendimit të marrë nga Kolegjet e Bashkuara të GJL, ku u ndryshua pjesërisht praktika për masën e arrestit.
Shqyrtimi i këtij rekursi vjen po ashtu, vetëm tre ditë pasi Gjykata Kushtetuese pranoi pjesërisht ankimin e Veliajt kundër masës “arrest në burg” të caktuar në 3 shkallët e gjyqësorit.
Kushtetuesja ktheu çështjen për rigjykim në Gjykatën e Lartë, pasi konstatoi se kjo gjykatë nuk kishte arsyetuar në vendim disa nga pretendimet e Veliajt.
Veliaj ndodhet në arrest me burg që prej 10 shkurtit 2025. SPAK ka renditur ndaj tij 13 akuza, si korrupsion pasiv, pastrim parash, mosdeklarim pasurie, shpërdorim detyre dhe futja e sendeve në burg.
Shumica e akuzave lidhen me korrupsionin pasiv, të kryer në 9 raste, në raport me disa kompani, për të cilat SPAK thotë se ai ka marrë përfitime të parregullta në formën e shumave monetare dhe pasurive të paluajtshme.
Sipas akuzës, këto subjekte kanë marrë leje ndërtimi dhe kanë përfituar fonde publike nga Bashkia Tiranë.
Edhe bashkëshortja e tij, Ajola Xoxa, akuzohet nga SPAK për korrupsion pasiv në 9 raste, në lidhje me subjekte tregtare dhe organizata jofitimprurëse, njëjtë si Erion Veliaj.
Gjithashtu, Xoxa akuzohet edhe për pastrim parash, mosdeklarim pasurie dhe fshehje të të ardhurave.
LEXO EDHE:
Shanset e Erion Veliajt për liri, 50-50. Kulisat në Gjykatën e Lartë dhe Kushtetuese
