Detaje të reja kanë dalë në dritë lidhur me vdekjen tragjike të 19-vjeçares shqiptare, Myrto, në një hotel në Argostoli të Greqisë.
Sipas pamjeve filmike të siguruara nga autoritetet greke dhe dëshmive të njërit prej tre të arrestuarve, e reja kishte konsumuar në mënyrë të përsëritur kokainë, e cila dyshohet se ishte siguruar nga një ish-kampion i peshëngritjes në bashkëpunim me një mik të tij nga Shqipëria.
Ngjarja mori kthesë dramatike në momentin kur 19-vjeçarja humbi ndjenjat në dhomën e hotelit. Në vend që të kërkonin ndihmë mjekësore urgjente, tre të rinjtë që ndodheshin me të nuk njoftuan ambulancën. Përkundrazi, ata tentuan të fshihnin çdo provë që mund t’i implikonte në ngjarje.
Sipas hetimeve, ata e transportuan trupin e pajetë dhe e braktisën në hyrje të hotelit, duke u përpjekur të shmangnin përgjegjësinë. Edhe pse në deklarimet e tyre kanë pretenduar se vepruan nga paniku dhe frika, sjellja e tyre, siç rezulton nga provat, ka qenë e ftohtë dhe e kontrolluar.
Mjekët ligjorë kanë konfirmuar se shkaku i vdekjes ishte arresti kardiak, i dyshuar si pasojë e përdorimit të lëndëve narkotike. Hetimet vijojnë për të zbardhur plotësisht rrethanat e kësaj ngjarjeje të rëndë dhe për të përcaktuar përgjegjësitë penale të personave të përfshirë.
