Një bandë kriminale me shtetas shqiptarë është goditur nga policia britanike pas një serie vjedhjesh me thyerje, ku u grabitën sende me vlerë mbi 1 milion paund.
Sipas autoriteteve, në pranga kanë përfunduar Endrit Nikolli (27 vjeç), Kristian Gropcaj (30 vjeç), George Pepa (31 vjeç), Krisjian Dedndreaj (28 vjeç) dhe Sidorjan Lleshi (26 vjeç). Të gjithë kanë pranuar fajësinë për komplot për të kryer vjedhje me thyerje dhe për posedim të pasurisë kriminale.
Gjykata ka dhënë dënime të rënda për disa prej tyre: George Pepa është dënuar me 10 vite burg, ndërsa Krisjian Dedndreaj me 10 vite e 9 muaj. Për Endrit Nikollin pritet një vendim në një seancë të ardhshme. Ndërkohë, një 33-vjeçare britanike, Jade Tubb, e përfshirë në skemë, ka pranuar fajësinë dhe është dënuar me 12 muaj burg me kusht.
Hetimet zbuluan se banda vepronte në mënyrë të organizuar, duke hyrë në banesa përmes dritareve ose ballkoneve të katit të parë, shpesh me ndihmën e shkallëve. Ata grabisnin bizhuteri, para cash, ora të shtrenjta dhe aksesorë luksozë.
Policia nisi hetimet në tetor 2024, pas një vale vjedhjesh në zonën e Cheshire-it lindor.
Hetimet zbuluan se ata takoheshin rregullisht në një kafene në Birmingham, ndërsa prova të ADN-së lidhën drejtpërdrejt Endrit Nikollin me një nga vendet e krimit në Staffordshire.
Operacioni përfundimtar u zhvillua më 2 korrik, kur policia bastisi disa prona në Walsall, Sutton Coldfield dhe Birmingham, duke arrestuar pjesën më të madhe të grupit.
Gjatë kontrolleve u sekuestruan çanta firmato, ora me vlerë rreth 17 mijë paund dhe telefona celularë që përmbanin prova të aktivitetit kriminal.
