Kreu i PD-së, Sali Berisha, i ka cilësuar ndërtimet e larta në kryeqytet si “lugetër pa drita” dhe “monumente të vjedhjes e korrupsionit”.
Në një konferencë për shtyp, ai tha se pjesa më e madhe e investimeve në këtë sektor nuk vijnë nga kapitali i huaj, por nga paratë e krimit.
Berisha theksoi se investimet e huaja direkte kanë rënë ndjeshëm, duke zbritur nga 1.6 miliardë euro në 800 milionë.
Sipas tij, rreth 32 përqind e këtyre investimeve janë blerje apartamentesh dhe katesh nga shqiptarët që jetojnë jashtë vendit.
“Investimet kanë zbritur nga 1 miliardë e 600 milionë në 800 milionë. Me 800 mln e tjera investime, 32 përqind e tyre janë blerje apartamentesh dhe katesh nga shqiptarët jashtë vendi në Shqipëri. Pra, shihen kullat, të gjitha katet në tërësi pa drita. Janë krijuar lugetërit pa drita në Tiranë. Çfarë janë këta lugetër, monumente të vjedhjes e korrupsionit.
Nuk janë të pashitura, por të blera e të kyçura ga grupet më së shumti kriminale, por edhe qytetarë të ndershëm. Por dyert e mbyllura nuk krijojnë punësim, prodhim, janë pasur e ngrirë dhe me një fjalë, sigurisht që janë të ardhura se merren taksat, por asgjë nuk sjellin.
Pra ngelen gjithsej më pak se 18 përqind apo më pak se 300 milionë. Nga 1 miliardë e 600 mln që janë investime, 300 milionë kanë qenë investimet në vitin 2004. Ky ka vetinë e paturpësisë që të gënjejë për cdo gjë. “, theksoi Berisha.
