Një prind i një studenti ekselent në Universitetin e Mjekësisë ka denoncuar mosshpërndarjen e bursave të ekselencës për këtë vit akademik, pavarësisht se VKM-ja 903 parashikon përfitimin prej 100 mijë lekësh të vjetra në muaj për studentët me mesatare 9–10.
Ndërsa universitetet e tjera i kanë shpërndarë paratë, Mjekësia ende nuk ka publikuar listat dhe nuk ka kryer pagesat. Administrata jep versione kontradiktore për këtë ngërç.
Financa thotë se procesi është në pritje të procedurave dhe frekuentimeve, ndërsa sekretaria pohon se listat e përfituesve kanë mbërritur. Ndërkohë, rreth 500 studentë pretendojnë se u kërkohet të nënshkruajnë kontrata për punë të detyruar pas studimeve; në të kundërt rrezikojnë të mos përfitojnë bursën.
Qytetarja – Të lutem për këto bursat e ekselencës! Ça është bërë?
Financa – Bursat e ekselencës?
Qytetarja – Po!
Financa – Asnjë nuk ka marrë bursë. Asnjë nga studentët nuk ka marrë bursë.
Qytetarja – Që s’ka marrë njeri, këtë e kam marr vesh unë, po ngaqë universitetet e tjera i kanë shpërndarë bursat.
Financa – Ok, pra…!
Qytetarja – Ndërsa këtu s’kanë dalë akoma emrat.
Financa – S’kanë dalë akoma, nuk kanë dalë. Nuk kanë dalë frekuentimet, nuk kanë dalë… Ti je studente?
Qytetarja – Kam djalin.
Financa – Atëherë, nuk kanë dalë akoma.
Qytetarja –Pse?
Financa – Sepse nuk kanë ardhur frekuentimet, presim. Do dalin nga prilli. Patjetër, që të gjithë këto muajt, domethënë, do merren dhe do merren njëherësh. Neve tani na ka ardhur lista… Ok! Ju jeni ekselencë, po ka edhe studentë, që janë me kriter, për shembull me prind në nevojë, ky lloj. Me ndihmë ekonomike, apo jo dhe neve, para pak shumë pak ditësh, domthënë para 2-3 ditësh, ka dalë vendimi i bordit njëherë. Ndërkohë, duhet të vijë edhe frekuentimi nga sekretaria, pastaj të japim bursat ne.
Qytetarja – Po pse me kaq vonesë pra këtu? Këtë po them.
Financa – Nuk është në dorën tonë fare. Ne jemi hallka e fundit fare, që do japim lekët.
Financa – Arsyeja, pse s’ka dalë, sepse sapo u miratua buxheti dhe kemi dhe ne proçedurat tona deri në momentin e përfundimit. Ok?
Sekretaria
Qytetarja – Isha te financa. Te financa thonë, që nuk kanë ardhur frekuentimet. Nuk i ka dërguar sekretaria.
Sekretaria – Ne, frekuentimet, i marrim nga Departamentet si rregull.
Qytetarja – Te të gjithë universitetet e tjera janë shpërndarë bursat, ndërkohë këtu nuk kanë dalë akoma emrat.
Sekretaria – Emrat erdhën dje. Unë isha në protokoll dje, të gjitha kanë ardhë nga protokolli, emrat, që janë miratuar. Vijnë, t’i sjellin departamentet, frekuentimet te ne dhe ne ia përcjellim financës.
Qytetarja – Atëherë duhet të shkojë të Dep… Ku të shkoj tjetër të pyes?
Sekretaria – Asnjë gjë. Ne thjesht do na vijnë ato frekuentimet edhe do ia përcjellim.
Sipas avokatëve Klaudi Zholi dhe Adriana Kalaja, ky kushtëzim përbën shkelje ligjore, pasi bursa e ekselencës nuk mund të lidhet me detyrimin për punësim. /tvklan.al
