Studentja Laura Kërtalli ka deklaruar se protesta qytetare ka evoluar përtej kërkesave fillestare dhe tashmë ka marrë një dimension të qartë politik.
Gjatë një interviste në A2 CNN, ajo tha se do të ishte e gatshme t’i bashkohej një force të re politike, nëse kjo do të përfaqësonte frymën dhe kërkesat e ngritura nga protestuesit.
Sipas Kërtallit, lëvizja ka kaluar nëpër etapa të ndryshme dhe sot përfshin një sërë çështjesh me natyrë politike.
Ajo argumentoi se energjia dhe pakënaqësia e qytetarëve duhet të organizohen në një projekt politik të strukturuar, i cili të ketë një element të fortë bashkues.
Kërtalli theksoi se ky element duhet të lidhet me identitetin kombëtar dhe ndjenjën nacionaliste, duke e konsideruar atë si pikën që mund të bashkojë qytetarët rreth një vizioni të përbashkët politik dhe shoqëror.
“Ne e pranojmë me kënaqësinë më të madhe ftesën për t’u bërë pjesë e një lëvizje politike të re. Protesta tashmë është shndërruar në politike.
Ka pasur dy faza, Zvërneci, dhe faza e dytë që ka një sërë kërkesash që kanë karakter politik. Protesta mbart në vetvete një fabul sepse kjo lëvizje që ne pretendojmë të bëjmë, me karakter politik, duhet të ketë patjetër një element unifikues që ta shndërrojë të gjithë këtë pakënaqësi në një lëvizje me karakter politik.
Ky karakter unifikues duhet të jetë ajo çfarë na bashkon të gjithëve, kombësia ose ndjenja nacionaliste, për të vetmen arsye se është mesazhi i kësaj fabule”, u shpreh ajo.
