Një 42-vjeçar shqiptar është vënë në pranga nga policia italiane, i dyshuar si pjesëtar i një bande “skifterësh” që kryente grabitje në zonën e Torinos duke përdorur edhe armë.
Ngjarja ndodhi mëngjesin e 21 marsit, gjatë patrullimeve rutinë në Via Sospello. Oficerët vunë re një burrë që përdorte një elektrik dore për të vëzhguar pjesën e sipërme të një dere.
Pas kontrollit në ndërtesë, policët dëgjuan zhurma dhe panë tre individë që dolën me nxitim, duke u larguar në dy drejtime të ndryshme.
Falë reagimit të shpejtë, policia arriti të arrestojë shqiptarin 42-vjeçar, ndërsa dy të tjerë u arratisën. Hetimet zbuluan se autorët kishin hyrë në bodrume duke thyer drynat me forcë.
Gjatë ndjekjes, oficerët gjetën një pistoletë të vjedhur me fishek në karikator, si dhe një çantë me bizhuteri të vlefshme – unaza, byzylykë, varëse dhe orë.
Paratë e dyshuara nga krimi Gjatë kontrollit personal, tek i arrestuari u sekuestruan edhe 740 euro, të dyshuara si të ardhura nga aktivitetet kriminale.
