Gjykata e Posaçme ka vendosur masën e sigurisë “arrest me burg” për Durim Bamin, i cili u ekstradua të enjten nga Dubai drejt Shqipërisë.
Bami nuk ishte i pranishëm në seancën gjyqësore dhe u përfaqësua nga avokati i tij, Ilir Murati. Mbrojtja kërkoi zëvendësimin e masës me një masë më të lehtë, si “arrest shtëpie”, por kërkesa u rrëzua nga trupa gjykuese.
Avokati Murati ngriti gjithashtu shqetësimin se klientit të tij i rrezikohet jeta në ambientet e burgut 313, duke kërkuar marrjen e masave për garantimin e sigurisë së tij.
Çështja pritet të shqyrtohet nga Drejtoria e Burgjeve në bashkëpunim me SPAK, për një transferim të mundshëm në një institucion tjetër të vuajtjes së dënimit.
