Një plantacion i madh marijuane është zbuluar nga autoritet, në një depo në Lodi Vecchio (Lodi), të Italisë.
Sipas mediave të huaja, magazina ishte transformuar në një serë të sofistikuar, me sisteme ujitjeje, llamba që simulojnë rrezet e diellit, ku u gjetën gjithsej 1,200 bimë marihuane. Përveç bimëve, karabinierët gjetën edhe 14 kilogramë bimë të tjera narkotike të paketuara për shitje.
Sipas raportimeve, pronarë të plantacionit ishin dy shqiptarë, të moshës 30 dhe 31 vjeç, të cilët u arrestuan nga karabinierët.
Hetuesit lokalizuan magazinën bazuar në informacione të marra nga fqinjët, dhe pas disa orësh vëzhgimi dhe kontrolli, mundën të arrestonin në flagrancë dy shqiptarët.
Këta të fundit u ndaluan me urdhër të prokurorisë së Lodit, në pritje të një seance dëgjimore për vërtetimin e arrestit, ndërsa bimët dhe droga e paketuar u sekuestruan dhe do të asgjësohen sipas procedurës.
