Katër shtetas shqiptarë janë dënuar me mbi 11 vite burg në total nga drejtësia në Mbretëria e Bashkuar, pasi akuzohen si pjesë e një grupi të organizuar kriminal që merrej me kultivimin dhe shpërndarjen e kanabisit.
Sipas policisë, grupi drejtohej nga vëllezërit Sefedin Tafa dhe Eldi Tafa, të cilët siguronin ambientet që përdoreshin si “shtëpi bari”, si dhe koordinonin aktivitetin e kultivimit. Në këtë rrjet ishin të përfshirë edhe Servet Dobrushi dhe Reols Havalja, të cilët merreshin me menaxhimin e plantacioneve dhe shpërndarjen e lëndës narkotike.
Hetimet nisën në gusht 2023, pas zbulimit të një plantacioni të madh kanabisi në një banesë në Southend-on-Sea, ku u sekuestruan qindra bimë, para në dorë dhe prova që implikonin drejtpërdrejt anëtarët e grupit. Kontrollet e mëtejshme çuan në zbulimin e shumave të konsiderueshme parash dhe sasi të tjera kanabisi, përfshirë 10 kilogramë të gjetura në Caerphilly, në Uells.
Gjatë operacionit u evidentuan edhe prona të tjera të përshtatura për kultivim, të pajisura me sisteme ndriçimi dhe ventilimi, ndërsa autoritetet vlerësuan se grupi kishte përfituar mbi 500 mijë paund nga aktiviteti i paligjshëm përgjatë viteve 2023–2025.
Pas arrestimeve dhe procesit gjyqësor, Sefedin Tafa u dënua me 4 vite e gjysmë burg, Asterjo Sata me 32 muaj burg, Reols Havalja me 23 muaj burg dhe Servet Dobrushi me 27 muaj burg. Ndërkohë, Eldi Tafa rezulton ende në arrati jashtë Mbretërisë së Bashkuar dhe kërkimet për kapjen e tij vijojnë.
