Një operacion i përbashkët i Policisë Kombëtare spanjolle dhe Shërbimit të Mbikëqyrjes Doganore ka çuar në shpërbërjen e një organizate të strukturuar ndërkombëtare të trafikut të drogës, e cila kishte futur 200 kilogramë kokainë në portin e Vigos.
Sipas mediave të huaja, operacioni, i njohur si “Operacioni Monterrey”, përfundoi me tetë arrestime pas një hetimi intensiv që zgjati 17 muaj.
Të arrestuarit përfshijnë tre shtetas me origjinë shqiptare, tre galicianë, një francez dhe një shtetas letonez, ky i fundit i identifikuar si kreu i organizatës dhe i shpallur më parë në kërkim për lidhje me trafikun ndërkombëtar të drogës.
Sipas autoriteteve, hetimi nisi duke vënë në shënjestër disa shtetas galicianë të njohur për policinë, të cilët shërbyen si hallkë lidhëse me grupin shqiptar. Këta persona ofruan mbështetje operative për realizimin e trafikut.
Droga u transportua nga Ekuadori drejt Vigos, e fshehur në një kontejner me lëkura frutash, duke përdorur metodën e ashtuquajtur “grep i verbër” (gancho ciego), një teknikë e zakonshme e kontrabandës detare. Anëtarët e organizatës udhëtuan drejt Vigos, ku u strehuan në hotele dhe në një apartament me qira për të marrë ngarkesën.
Operacioni kulmoi më 12 janar, me arrestimin e pesë personave: tre në një restorant në Vigo dhe dy të tjerë në apartamentin ku u gjetën 200 kilogramë kokainë, të ndarë në pako rreth një kilogram secila, me logon “Kia”. Të arrestuarit u lanë në paraburgim me urdhër gjykate. Një javë më vonë, u arrestuan edhe tre shtetas galicianë nga A Coruña, Lugo dhe zona e Arousës.
Kreu i rrjetit ishte shtetasi letonez Aleksei Pustovarov, i përshkruar si toger i trafikantit të njohur Brian Colin Charrington, i cili ndërroi jetë në korrik të vitit të kaluar.
Autoritetet theksuan se bëhej fjalë për një organizatë shumë profesionale, e cila kontrollonte të gjithë zinxhirin e trafikut: nga prodhimi i drogës në vendin e origjinës, te transporti dhe shpërndarja në Evropë. Sipas policisë, kjo ishte dërgesa e parë e realizuar nga ky grup i veçantë.
Gjatë operacionit u sekuestruan gjithashtu më shumë se 20 mijë euro cash, dokumente dhe telefona celularë. Hetimet mbeten të hapura dhe nuk përjashtohen arrestime të tjera, sipas Njësisë së Drogës dhe Krimit të Organizuar (UDYCO) në Vigo.
