Erzen Tola, i akuzuar nga Kontrolli i Lartë i Shtetit për shkelje të rënda ligjore dhe për të cilin është kërkuar zyrtarisht largimi nga shërbimi civil, vijon të mbajë postin e Sekretarit të Përgjithshëm të Ministrisë së Arsimit.
Ishte fillimisht ministrja Ogerta Manastirliu, e cila kur ishte në krye të Arsimit, ka refuzuar të zbatojë rekomandimet e KLSH-së, duke e mbajtur Tolën në detyrë.
Tola, sipas raportit të KLSH-së, rezulton të jetë i përfshirë në një sërë shkeljesh ligjore, por sërish vazhdon të qëndrojë në postin e sekretarit, duke ngritur dyshime mbi ndikimin dhe mbrojtjen që gëzon brenda strukturave të Ministrisë. Kjo pasi, edhe pse tashmë që në krye të këtij institucioni është caktuar Mirela Kumbaro, sërish Tola vijon të mbajë postin e sekretarit.
Në dokumentin zyrtar të KLSH-së, rekomandohet qartë masa disiplinore “largim nga shërbimi civil” për Erzen Tolën, megjithatë, të dy ministret e Arsimit e kanë bllokuar këtë proces, duke e mbajtur Tolën si një “ushtar besnik” për interesa politike.
Sipas audituesve të KLSH-së, shkeljet e Tolës, me rrogë 10 mijë euro, lidhen me moskryerjen e detyrave funksionale në kohë, vonesat ose mungesën e inicimit të proceseve gjyqësore për rikthimin e fondeve të përfituara nga studentë dhe nëpunës civilë në shkelje të kontratave, si dhe me keqadministrimin e mbështetjes financiare për studentët e ekselencës.
Por pavarësisht akuzave të rënda të ngritura nga Kontrolli i Lartë i Shtetit dhe kërkesës zyrtare për largimin e tij nga shërbimi civil, Erzen Tola vijon të mbetet në detyrë. Duket se Ministria e Arsimit, nën shembullin e Edi Ramës, i ‘mban peng’ vartësit e kapur në shkelje për ti përdorur më pas si ‘mish për top’ në zbatimin e urdhrave antiligjorë.
