Detaje të reja kanë dalë në dritë nga ngjarja e regjistruar në lagjen nr.14 në Nishtulla të Durrësit, ku një çift është rrahur me grushta brenda makinës së tyre nga tre persona.
Lidhur me rastin Policia njoftoi se ka nisur procedimi penal për një prej autorëve, (44 vjeçari A.Z,) ndërsa janë shpallur në kërkim dy të tjerë, ( S. Z., 46 vjeç, dhe V. R., 37 vjeç), ndërkohë që gruaja e dhunuar V. Meçani, ka treguar se janë ngujuar të gjithë si familje në shtëpi, pasi kanë frikë të dalin, për aq kohë sa autorët vijojnë të jenë të lirë.
“Kemi frikë të dalim nga shtëpia se mos na rrahin sërish. nuk kam dalë as për të blerë bukë për fëmijët!”, ka thënë V. Meçani për News 24.
Sipas shtetases V.Meçani, i pari që është goditur nga 3 autorët është 55–vjeçari Fatmir Meçani, bashkëshorti i saj.
Në momentin që vëllai i tij, Lulzimi, bashkëshortja e Fatmirit dhe kunata e tij po e shoqëronin në spital, makina e tyre është goditur nga po të njëjtët persona që më parë kishin gjakosur Fatmirin, tregon gruaja.
Familja Meçani, pas dhunës së pësuar ndihet e kërcënuar dhe e pambrojtur, përsa kohë këta shtetas janë ende të lirë. Sipas ktyre, kjo nuk është hera e parë që ata i dhunojnë, ashtu siç kanë dhunuar edhe familje dhe persona të tjerë po në atë zonë ndërkohë që Policia nuk ka marrë asnjë masë konkrete ndaj tyre.
