Nga Boldnews.al
Zëvendëskryeministres dhe ministres më të pushtetshme të Ramës i është prerë bileta me nisje Tiranën dhe mbërritjen Pojskë (IEVP e grave), por një tjetër qeli, e arreduar bukur edhe me shije artistike tek reparti 313, mund të bëhet gati, në pritje të bujtësit më të famshëm në vend. Fundi dihet, por koha nuk parashikohet dot.
Për momentin, kryeministri Edi Rama ka një siklet që duhet ta kalojë. Janë dy çështje që e trazojnë fort, sidomos njëra, që po flitet më pak, dhe jo pa qëllim. Çështja e parë është marrja e pandehur e zëvendëses së tij, Belinda Balluku, e akuzuar për “shkelje të barazisë në tendera”, në të paktën 11 procedura në vlera që i kalojnë një miliardë euro. Prokuroria Speciale i kërkoi Parlamentit autorizim për të ekzekutuar ndaj saj masën e arrestit, por më parë duhet ta vendosë Rama se çfarë do të bëjë me të.
Shpresoi se Bela e tij do jepte dorëheqjen për të mirën e kryetarit, të partisë dhe lugunisë së pushtetit. Ajo nuk po e bën, ndaj vendimi është në duart e vetë Ramës i cili në këto momente po kërkon kohë, ndonëse e di se kohën nuk mund ta ketë pafund.
Bela është një bela më shumë (jo aq e vogël), para hallit më të madh që ai ka. AKSHI është gropa e madhe që mban edhe gjatoshë 1.98 cm… Bela dhe “lindat në katrorë” mbesin oazi i shpirtit, por edhe i kamjes, para skamjes popullore. Në dosjen e AKSHI-t janë njerëzit që kryeministri nuk i bën dot lanet. Nuk ka si të thotë se hëngrën kumbulla e dardha pas shpine, pasi gostia është bash e në tryezën e tij.
Dokumentet tregojnë se Mirlinda Karçanaj në krye të AKSHI-t ishte kthyer si bankomat personal në vlera të frikshme për njerëz shumë pranë kryeministrit, madje fare, po fare pranë. Ky hall nuk zgjidhet pa marrëveshje me “djajtë” për të nënshkruar “marrëveshjen e daljes” nga këneta që ngriti vetë dhe për 12 vite e mendoi veten të paprekshëm.
Kryeministri harroi konceptin kohë se kur kërkon të varrësosësh për së gjalli kundërshtarët politikë duhet t’i përmbahesh edhe kohës kur duhet të dalësh, por ai u dashurua aq shumë me pushtetin absolud në treshën krim-qeveri-biznes, sa harroi se vitet shkuan.
Në kohën kur Prokurororia Speciale SPAK izolonte në banesë kreun e opozitës, Sali Berisha dhe opozitarin tjetër Ilir Meta e zvarriste në rrugë në një arrestim të dhunshëm, kryeministri Edi Rama përjetoi ditët e tij më të mira. Çfarë mund të kërkonte më shumë? Pushtet po, hajni pa limit, kontroll drejtësie, miqësi ndërkombëtare dhe forcë bandash që punonin për një qëllim: pushtet të përbashkët dhe rrënimin e opozitës.
Dora përkedhelëse ndërkombëtare nuk është më e zgjatur për të. Drejtësia ka ca hesape për të larë me veten, pasi kamikazllëku politik me çekiçin e drejtësisë nuk mund të kthehej në një armë të përhershme. Tani është koha që Rama të bëjë zgjidhje me Belën dhe belatë shumë po shumë fare pranë tij, për të cilën nuk ka si të thotë: “nuk dija gjë”. Së pari është i pabesueshëm dhe mbi të gjitha, prova mban ca gjurmë papilare të gishtit të madh dhe atij tregues që fërkohet bashkë në numërimin e shumave të frikshme prej të cilave mbahet pushtet dhe pasuri marramendase! Këtë herë nuk do jetë e lehtë, ndonëse paradoksilisht lehtësuesi më i madh i tij është opozita e copëtuar në ide dhe numra.
