Eraldi është një qytetar nga Tirana, i cili tregon për emisionin “Stop” në Tv Klan se në vitin 2015 bleu një Volkswagen Golf 7 përmes një ndërmjetësi. Një vit më vonë, makina e tij u bllokua nga dogana, pasi rezultoi se ishte paguar vetëm gjysma e taksave doganore.
Eraldi ndërmori veprimet, për të liruar veten nga hetimi, duke provuar se nuk kishte asnjë përfshirje në kontrabandë dhe u shpall jashtë hetimit penal. Megjithatë, makina mbetet e bllokuar nga dogana, nuk mund të shitet dhe as të dalë jashtë vendit, ndërkohë që taksat vazhdojnë të paguhen nga Eraldi.
“Unë këtë makinë e kam blerë te një shok, i kam dhënë lekët dhe të gjitha detyrimet i ka bërë ai. Unë mora makinën, pas një viti më thonë që është bërë gjysmë dogane për këtë makinë, ma morën makinën dhe ma çuan te drejtoria e doganës. Vazhduam me këto procedurat, pas janarit pagova lekët, diferencën e mbetur që ishte dhe më kthyen makinën me një letër prokurorie, mbeti në alert. U bënë gati 10 vjet që makina vazhdon të jetë në alert. Ia jam drejtuar gjykatës për të ma hequr sekuestron, i kam çuar letrat te drejtoria e doganave dhe vazhdon del alert. Nuk mundem as ta shes, sepse del e bllokuar te targat. Vazhdoj paguaj taksat çdo vit”, thotë denoncuesi.
Kur u interesua për statusin e mjetit pranë DPSHTRR, iu tha se makina kishte bllokim nga dogana dhe duhet të kontaktonte me doganën për veprimet e mëtejshme. Në fakt automjetit i është vendosur një gjobë për kontrabandë, e cila është sa dyfishi i vlerës doganore.
Qytetarja: Për të kontrolluar një targë makine! Thjesht për ta parë në sistem, se dua të bëj veprimet, për ta shitur, por dua të di, nëse është e lirë, apo jo. A ka ndonjë bllokim, ndonjë gjë? Prandaj!
DPSHTRR: Ok! Patjetër! Më jepni targën ju lutem! AA 866 OX. Atëherë, mjeti është Volkswagen Golf. Atëherë, 2025 është bërë pagesa. Kam përshtypjen, që ka një bllokim. Atëherë, ka një bllokim nga dogana, do au printoj shkresën dhe të interesoheni pastaj te dogana, lidhur me këtë.
Qytetarja: Aktualisht, nuk mund të bëhet asnjë veprim.
DPSHTRR: Jo! Jo!
Dogana kërkon që qytetari ta paguajë gjobën, dhe heqja e saj mund të bëhet vetëm nëpërmjet gjykatës administrative. Avokati Klaudi Zholi thekson se detyrimi nuk i takon qytetarit, për sa kohë personat përgjegjës, janë duke dhënë llogari para drejtësisë. Tv klan
