Dhjetëra qytetarë janë mbledhur sot para Bashkisë së Vlorës, duke shprehur zemërimin e tyre për mungesën prej pesë ditësh të ujit të pijshëm në qytet.
Me thirrjet “Jepni dorëheqjen!”, protestuesit kërkuan llogari nga drejtuesit lokalë për situatën e krijuar, të cilën e cilësojnë alarmante dhe të rrezikshme për shëndetin publik. Sipas tyre, gjendja ka arritur në prag të një epidemie.
Një prej qytetarëve kërkoi ndërhyrje të menjëhershme nga prefektura dhe ministritë përkatëse. Ai akuzoi institucionet për propagandë, duke theksuar se flitet për ardhje pjesësh këmbimi nga Selaniku apo Mali i Zi, ndërkohë që prej vitesh janë tenderuar miliona euro pa sjellë zgjidhje konkrete.
“Të shpallet gjendje e jashtëzakonshme në Vlorë ose kryetarja e Bashkisë të japë dorëheqje. Të vijë prefektja, të vijë ministrja përkatëse dhe të merren masa urgjente. Vlora është në alarm,” u shpreh një nga qytetaret pjesëmarrëse në protestë.
Ndërkohë një tjetër protestues mbante në dorë një pankartë me mbishkrimin “Ujësjellësi i Lubisë”, duke iu referuar zv/kryeministres Belinda Balluku.
Një tjetër qytetare u shpreh se mungesa e ujit po kthehet në rrezik për shëndetin, duke theksuar se një situatë e tillë është e papranueshme për një qytet si Vlora.
Sipas protestuesve, Bashkia e Vlorës është kthyer në një “institucion turpi”, që prej 26 vitesh ka keqmenaxhuar situatën dhe e ka lënë qytetin pa shërbime bazë. Ata kërkojnë që drejtuesit aktualë dhe ata të mëparshëm të mbajnë përgjegjësi për gjendjen e krijuar.
