Rusia duket se ka nisur vendosjen e raketave balistike hipersonike me kapacitet bërthamor në një ish-bazë ajrore në Bjellorusinë lindore, një veprim që mund të rrisë ndjeshëm aftësinë e saj për të goditur objektiva në të gjithë Evropën. Lajmi bëhet i ditur nga agjencia Reuters, duke cituar dy studiues amerikanë që kanë analizuar pamje satelitore të zonës.
Sipas burimeve të njohura me vlerësimin e inteligjencës amerikane, ky zhvillim përputhet me të dhënat që tregojnë se Moska po përgatitet për dislokimin e raketave të reja me rreze të mesme veprimi, të njohura si Oreshnik, të afta të mbajnë koka bërthamore dhe të godasin objektiva deri në 5,500 kilometra larg.
Presidenti rus Vladimir Putin ka deklaruar më herët se Rusia synon të vendosë këto raketa në territorin e Bjellorusisë, megjithëse vendndodhja e saktë nuk është bërë publike.
Ekspertët e sigurisë e shohin këtë lëvizje si pjesë të një strategjie më të gjerë të Kremlinit për të rritur presionin ndaj NATO-s dhe për të penguar mbështetjen ushtarake perëndimore për Ukrainën. Sipas tyre, vendosja e sistemeve hipersonike përfaqëson një përshkallëzim të rrezikshëm të kërcënimit bërthamor në Evropë.
Ambasada ruse në Uashington nuk ka reaguar ndaj kërkesave për koment, ndërsa ambasada e Bjellorusisë ka refuzuar të japë një qëndrim zyrtar.
Ndërkohë, agjencia shtetërore bjelloruse Belta citoi ministrin e Mbrojtjes së vendit, Viktor Khrenin, i cili tha se vendosja e raketave nuk ndryshon balancën e sigurisë në Evropë dhe se bëhet fjalë për një “përgjigje ndaj veprimeve agresive të Perëndimit”.
