Dorjan Teliti ka ngritur shqetësime për mënyrën se si po menaxhohet Bashkia e Tiranës, duke theksuar mungesën e transparencës dhe problematikat me të cilat, sipas tij, përballen çdo ditë qytetarët.
Në një intervistë në emisionin “Kjo javë” në News24, Teliti foli për situatën në Bashkinë e Tiranës, zhvillimet në Partinë Demokratike si dhe rolin e opozitës në mbrojtjen e kauzave qytetare.
Ai u ndal te vështirësitë konkrete në kryeqytet, duke përmendur mungesën e parkimeve, nevojën për infrastrukturë shtesë dhe shërbime publike më cilësore. Sipas tij, këto probleme janë pasojë e keqmenaxhimit dhe e mungesës së planifikimit nga ana e drejtuesve të bashkisë.
“Ka qenë një vit intensiv, sfidues me kauza që duhet t’i mbronim. Na kanë vënë shumë shkopinj nëpër këmbë, nga ana e mazhorancës. Kërkesën tonë bazike për të diskutuar se si po menaxhohet puna në bashkinë Tiranës. Kemi drejtorë që lëvizin mëngjes drekë darkë dhe nuk bëjnë transparencë mbi asnjë shpenzim të kryer në Bashkinë e Tiranës. Këshilli Bashkiak ka një mangësi sepse detyron mbledhje një herë në muaj që nuk është normale.
Këshilli Bashkiak duhet të mblidhej çdo javë. Ne përballemi me një censurë ekstreme sa i përket fjalës. Në vërtet mund të bëjnë çmos për të mbyllur gojën, por ne transparencën me qytetarët e bëjmë edhe në forma të tjerë, nëpërmjet mediave apo reagimeve të ndryshme. Sot bashkia e Tiranës ka para të mbledhura që nuk i ka shpenzuar dot dhe është fenomeni i fondeve të bartura…I ka marrë paratë, por nuk ka qenë i aftë për të dhënë shërbime”, tha ai.
