Kryedemokrati, Sali Berisha, ka akuzuar mbrëmjen e sotme se agjensitë shtetërore janë përdorur nga qeveria për të ushtruar presion dhe dhunë ndaj biznesmenëve me qëllim tërheqjen e tyre nga tenderat publikë.
Gjatë foltores me demokratët në Kurbin, Berisha u shpreh se personat e marrë peng janë dërguar sipas tij në ambjente private dhe bodrume, të lidhura me individë të botës së krimit, si Suel Çela.
Berisha përmendi raste konkrete, duke pretenduar se disa persona janë detyruar të heshtin pas kërcënimeve, ndërsa të tjerë janë larguar jashtë vendit dhe sipas tij këto raste janë zbuluar vetëm pas informacioneve të ardhura nga autoritete të huaja.
“A mund t’i imagjinoni ju një agjenci shtetërore, e shtetit, nga rojat tek drejtori, ku merren peng biznesmen, punonjës, e pa dëgjuar kurrë. Merren peng, çohen në bodrumet e Suel Çelës, ju thyen kockat, qepin gojën, tërhiqen nga tenderi dhe natyrisht është kunati i kryeministrit.
Kunati i kryeministrit, burri i motrës Linda Ramës. Ai që përfiton qindra milionë euro nga agjencia e shtetit.
Për njërin nga këto pengje u mor vesh sepse atij ja dha Zoti dhe i bëri një mesazh nënës së tij apo se kujt ja bëri, që po marrin peng. Dhe e bëmë zhurmë, absolutisht ju them një gjë këtu o miq. Mund të kem bërë një seri deklaratash se e ndiqja, po njeri që ta çelte gojën pasi u kthye në shtëpi për Danielin nuk kishte.
Danieli rrinte i bërë copa në shtëpi, gojën e qepte, as media, as shtet, askush nuk fliste më për të. Kurse tjetri para Danielit, Gerondi që është regjistruar duke thënë se, tenderat këtu i përcakton kunati dhe kunata, e marrin peng, tërheq çdo kërkesë dhe ja mbath në Gjermani. Dhe asnjëri nga ne nuk e mori vesh. E morëm vesh kur gjermanët sollën informacionin. E bëra këtë hyrje se situatë të tillë nuk ekziston në asnjë vend tjetër përveç Shqipërisë. Që ndërmarrje shtetërore të merren njerëzit peng. Kjo tejkalon të gjitha imagjinatën”,- është shprehur Berisha.
