Fëmijët në Tiranë po jetojnë mes zhurmave të trafikut, borive dhe fishekzjarrëve që po i ekspozojnë çdo ditë ndaj niveleve të rrezikshme akustike.
Mjeku kirurg ORL, Tedi Minarolli u shpreh se ky ekspozim i vazhdueshëm mund të shkaktojë vonesa në të folur, humbje dëgjimi, por edhe agresivitet dhe probleme emocionale te të vegjlit.
“Sigurisht që fëmijët janë target shumë të ndjeshëm në popullatë për disa arsye, sepse dëgjimi është një organ – le ta themi kështu – që është i lidhur me gjuhën. Nëse pate problem me dëgjimin, detyrimisht gjuha nuk zhvillohet si duhet. Organet e dëgjimit te fëmijët janë më të ndjeshme”, tha ai për “A2 CNN”.
Pra, nis problemi me të folurit?
“Problemet lidhen me sensitivitetin e dëgjimit dhe ndikimi është më i lartë tek fëmijët në krahasim me të rriturit. Përveç pengesave në dëgjim, zhurma ndikon edhe në cilësinë e jetës së një fëmije. Kush është i ekspozuar ndaj zhurmave ka probleme në përqëndrim. Këta fëmijë bëhen edhe agresivë; për shembull, ata që rrinë shumë kohë me kufje apo telefon”, u shpreh ai.
Ndikon edhe në sistemin nervor?
“Ndikon shumë. Boria e makinës mund të ndikojë te ulja e menjëhershme e dëgjimit. Nëse është shumë e fortë dhe bie direkt në vesh, kjo krijon probleme të mëdha. Jo vetëm që ulet dëgjimi, por mund të shkaktojë edhe patologji të tjera. Ka disa persona që dëgjojnë mirë, por zhurma në vesh dhe boria e makinës ta bën këtë gjë”, përfundoi mjeku.
