Reshjet e dendura të shiut gjatë orëve të fundit kanë shkaktuar probleme serioze infrastrukturore në shumë qarqe të Shqipërisë, duke krijuar përmbytje, rrëshqitje dhe shembje urash dhe rrugësh. Situata më kritike është regjistruar në Lezhë, Mirditë, Vlorë, Fier dhe Dibër, por dëmtime janë raportuar edhe në Durrës, Kukës, Shkodër, Elbasan, Berat, Korçë, Gjirokastër dhe Libohovë.
Lezhë dhe Mirditë:
Në Lezhë, fshatrat Jezull, Kodër Rrëshen dhe Njësia Administrative Mamurras kanë patur probleme nga rrëshqitjet e dheut dhe prurjet e lumenjve. Në Mirditë, disa ura dhe rrugë janë shembur, duke izoluar fshatra të tëra. Banorët kanë raportuar pamundësi për të lëvizur dhe kërkojnë ndërhyrje urgjente.
Durrës dhe Kukës:
Në Durrës, situata ka nisur të normalizohet në njësitë Sukth, Katund i Ri dhe Ishëm, ku ujërat janë tërhequr nga zonat e prekura. Në Kukës, pastrimi i akseve rrugore është në vijim dhe qasja për automjete është ruajtur e kalueshme.
Shkodër:
Në Shkodër, segmentet rrugore Theth–Ndërlysaj dhe Ndërlysaj–Breg-Lumi janë të rikuperuara, por puna vazhdon për garantimin e qarkullimit të sigurt.
Vlorë:
Në Vlorë, uji ka depërtuar në fshatrat Dermish dhe Brataj, ku disa banorë janë evakuuar. Në Delvinë, lumenjtë janë rikthyer në shtratin e tyre dhe qarkullimi rrugor është normalizuar.
Fier:
Në Fier, niveli i lumit Vjosë po rritet në mënyrë të shpejtë, veçanërisht në pikën Përmet–Memaliaj, dhe autoritetet kanë vendosur masa për menaxhimin e zonave kritike.
Elbasan:
Në Elbasan po punohet për pastrimin e inerteve në segmentet rrugore Elbasan–Peqin dhe Elbasan–Librazhd. Në fshatin Kerpicë, po monitorohen lumenjtë për të parandaluar përmbytjen e banesave.
Berat:
Rreth 20 hektarë parcela me ullishte në lagjet Lopari dhe Selamaj të fshatit Veterrik, Bashkia Berat, janë të përmbytura pas daljes nga shtrati të lumit Osum.
Korçë dhe Gjirokastër:
Në Korçë, situata në fshatin Sanjollas është normalizuar pas pastrimit të tombinove dhe inerteve. Në Gjirokastër, rrugët urbane kanë prezencë të ujit, ndërsa liqeni i Viroit po monitorohet për shkak të rritjes së nivelit. Në fshatin Lazarat dhe Kordhoce ka prurje të përroit që po rrezikojnë qarkullimin, ndërsa në aksin Gjirokastër–Valare qarkullimi bëhet vetëm me mjete të larta.
Dibër dhe Mat:
Në Dibër, njësitë Zall-Dardhë, Luzni, Tomin, Xibër dhe Klos kanë patur probleme me rrugët dhe përmbytje të tokave. Në Mat, disa shkolla dhe banesa janë përmbytur në katet e para, ndërsa rrugët lokale janë të bllokuara.
