Bashkimi Evropian ka miratuar rregulla të reja të patentave për të reduktuar numrin e vdekjeve në rrugë, i cili vitin e kaluar arriti në afër 20 000 viktima.
Reforma përfshin patentat digjitale, ndëshkime ndërkufitare për shkelësit e shpeshtë dhe teste më të rrepta për drejtuesit e rinj. Qëllimi është arritja e “Vision Zero”, asnjë fatalitet apo dëmtim serioz deri në vitin 2050.
Progresi i sigurisë rrugore ndryshon ndjeshëm midis vendeve. Suedia, Malta dhe Danimarka kanë rrugët më të sigurta, me 20-24 vdekje për milion banorë, ndërsa Rumania dhe Bullgaria kanë shkallën më të lartë të fataliteteve, respektivisht 78 dhe 74 për milion.
Gjermania raporton 33 vdekje për milion, nën mesataren e BE-së prej 45. Polonia shënoi rënien më të madhe që nga 2019, duke ulur numrin e vdekjeve për milion banorë nga 77 në 52.
Rregullat e reja parashikojnë kushte më të rrepta për marrjen dhe rinovimin e patentave, shkëmbim informacioni për shkeljet e rënda dhe promovimin e patentave digjitale.
Shkeljet serioze, si drejtimi nën ndikimin e alkoolit ose shpejtësia ekstreme, mund të çojnë në ndalim të drejtimit në të gjithë BE-në. Turistët që marrin gjoba të vogla nuk do të preken nga ndalimet ndërkufitare.
Për drejtuesit e rinj, testet do të përfshijnë më shumë trajnim mbi shpërqendrimin nga telefoni, sistemet ndihmëse të makinës dhe ndërveprimin me këmbësorët, fëmijët dhe biçiklistët.
Përveç kësaj, do të zgjatet mundësia e drejtimit të shoqëruar dhe do të vendoset një periudhë prove dyvjeçare me rregulla dhe ndëshkime më strikte.
Ndryshime ka edhe për drejtuesit profesionistë: mosha minimale për shoferët e kamionëve u ul nga 21 në 18 vjeç dhe për autobusët nga 24 në 21 vjeç. Gjithashtu, patenta e makinës dhe motoçikletës do të ketë një afat maksimal vlefshmërie prej 15 vjetësh, që mund të reduktohet në 10 vjet në shtetet ku shërben edhe si dokument identiteti.
Përveç mbështetjes së sigurisë, reforma synon të lehtësojë digjitalizimin e patentave. Gjermania ka ende pengesa për shkak të sistemeve të ndryshme në softuer, ndërsa Bullgaria është gati të prezantojë patentat digjitale.
Rregullat do të hyjnë në fuqi 20 ditë pas publikimit në Gazetën Zyrtare të BE-së, dhe shtetet anëtare kanë tre vjet për të i integruar dhe një vit për zbatimin praktik.
Kjo reformë pritet të reduktojë ndjeshëm numrin e aksidenteve dhe të përmirësojë sigurinë rrugore në gjithë Europën, duke e bërë drejtimin më të sigurt dhe më të kontrolluar për të gjithë qytetarët.
