37 persona janë arrestuar në Greqi në kuadër të një hetimi të gjerë për një nga skandalet më të mëdha të përvetësimit të fondeve bujqësore të Bashkimit Evropian, me vlerë miliona euro.
Operacionet e policisë u zhvilluan në Athinë, Selanik, Janinë dhe Kretë, pas hetimeve të përbashkëta të agjencisë evropiane kundër mashtrimit OLAF dhe Zyrës së Prokurorit Publik Evropian (EPPO).
Sipas hetuesve, të dyshuarit kishin përfituar subvencione duke deklaruar toka bujqësore të rreme përfshirë zona arkeologjike, aeroporte ushtarake dhe madje edhe pjesë të malit Olimp. Këto fonde ishin destinuar për fermerët e vërtetë, por u përvetësuan për qëllime personale.
Gjatë hetimeve, janë identifikuar 324 përfitues të rremë, ndërsa dëmi i shkaktuar për buxhetin e BE-së llogaritet mbi 19.6 milionë euro. Në total, 125 persona janë vënë nën akuzë për përvetësim fondesh gjatë periudhës 2018–2024.
Dy javë më parë, gjatë një vizite në Athinë, prokurorja e përgjithshme e BE-së Laura Kovesi e cilësoi agjencinë shtetërore OPEKEPE e cila menaxhon fondet bujqësore si “akronim për korrupsion dhe nepotizëm”.
“Për vite me radhë, kriminelët, të ndihmuar nga zyrtarë publikë, vidhnin paratë që duhej të ndihmonin fermerët e ndershëm. Ato përfunduan në vila, makina luksoze dhe llogari të fshehta”, deklaroi Kovesi.
Pas shpërthimit të skandalit, Komisioni Evropian vendosi ndaj Greqisë një gjobë prej 400 milionë eurosh, ndërsa autoritetet greke kanë sekuestruar 22 milionë euro nga më shumë se 1,000 llogari bankare të rreme. Vetëm një nga të dyshuarit në Kretë dyshohet se ka përvetësuar 2.5 milionë euro.
Agjencia OPEKEPE ka menaxhuar më shumë se 3 miliardë euro subvencione në vit për rreth 680 mijë fermerë.
