Shtetet e Bashkuara paralajmëruan këtë të enjte se janë të vendosura për të mbyllur konfliktin Rusi-Ukrainë në Europën Lindore, nëse Rusia nuk ndalon sulmet. Mesazhin e dha Pete Hegseth, sekretari amerikan i Mbrojtjes, nga Ministriali i NATO-s në Bruksel.
“Është koha që kjo luftë të mbyllet, të ndalet gjakderdhja dhe të ulemi në tryezën e negociatave të paqes. Nëse kjo nuk ndodh, SHBA dhe aleatët do të ndërmarrin të gjithë hapat për të siguruar që Rusia të përballet me kosto të larta për agresionin,” tha Hegseth, duke shtuar se Departamenti Amerikan i Mbrojtjes është i gatshëm të veprojë në mënyrë që vetëm SHBA e dinë.
Ai theksoi se NATO duhet të jetë e armatosur deri në dhëmbë dhe se paqja sigurohet përmes forcës.
Sipas zyrtarëve amerikanë, qëllimi është që Moska të heqë dorë nga ambiciet e saj në Ukrainë dhe të japë fund luftës. Hegseth njoftoi se aleatët do të japin Ukrainës “fuqinë e zjarrit”, duke i dhënë mundësinë që të mbrohet dhe të fitojë në terren.
Megjithatë, Samiti i NATO-s nuk ka dhënë ende përgjigje se SHBA do t’i japin Ukrainës raketat Tomahawk, me rreze veprimi mbi 2 mijë kilometra, të cilat mund të godasin edhe Moskën. Donald Trump ka deklaruar se nuk ka marrë vendim final për këtë çështje, megjithëse ka lënë të kuptohet se mund të aprovojë dërgimin e tyre në Kiev.
