Kryeministri Edi Rama ka deklaruar se Shqipëria nuk po kryen reformat për të kënaqur Bashkimin Evropian apo kryeqytetet e mëdha të Evropës, por për veten e saj.
Në një deklaratë në konferencën për shtyp me presidenten e KE, Ursula von der Leyen, ai theksoi se “detyrat nuk i bëjmë se na i kërkon BE, as për të kënaqur ata që nesër do të na miratojnë anëtarësimin”, duke shtuar me ironi se “Londra ka ikur në drejtim të paditur”.
Kryeministri sugjeron se viti 2027 do të jetë momenti kur “do të mbyllen grupkapitujt”, por nuk jep garanci për anëtarësim.
Ai e përshkruan procesin si një “certifikim” që Shqipëria është një “shtet funksional demokratik”, duke lënë të kuptohet se hyrja në BE është vetëm një hap pas kësaj.
Në deklaratën e tij, Rama u përpoq të relativizonte standardet evropiane duke e vendosur Shqipërinë në një pozicion krahasues me vendet më të zhvilluara të unionit.
“Edhe gjermanët që janë mbajtur për dekada si më të përsosurit, nuk janë aq të përsosur sa i dinim,” – tha ai ndër të tjera.
Pjesë nga deklarata e Ramës:
“Detyrat nuk i bëjmë se na i kërkon BE, as të kënaqim ata që nesër do të na miratojnë anëtarësimin, as në Paris, apo në Berlin, apo në… Më erdhi të them Londër, por Londra ka ikur në drejtim të paditur, ose në Romë. Detyrat i bëjmë për veten tonë, e bëjmë Shqipërinë më të fortë e funksional si shtet, Procesi i integrimit për ne është një proces shtetbërje demokratike.
Në fund të këtij procesi kur KE të thotë që e mbaruam punën tonë, ne Shqipëria, për veten tonë marrim një certifikatë, që në bazë të opinionit të BE jemi shtet funksional demokratik. Pastaj si i tillë, mund të hyjmë në BE, pastaj fillon procesi i përmirësimit, edhe gjermanët që janë mbajtur për dekada të tëra si më të përsosurit nuk janë aq të përsosur sa i dinim, tani po e kuptojnë edhe vet.
Për ne është fat që jemi në mes të Evropës dhe kemi BE që na shoqëron në këtë proces. Nëse do ishim jashtë këtij kontinenti dhe s’do kishim BE, do e kishim të pamundur të bënim një shtet funksional demokratik.”
