Gazetarja Anila Hoxha ka reaguar pas vrasjes tronditëse të gjyqtarit Astrit Kalaja brenda sallës së Gjykatës së Apelit në Tiranë, duke theksuar se kjo nuk është hera e parë që cenohet siguria e punonjësve të drejtësisë.
E ftuar në emisionin “Top Story”, Hoxha tha se prej kohësh ka raportuar për rastet e kërcënimeve dhe presioneve ndaj gjyqtarëve, por sipas saj, Prokuroria nuk ka ndërmarrë hetime për këto çështje.
“Kjo nuk është hera e parë që cenohet siguria e një gjyqtari. Ka ndodhur në Fier, ku është kërcënuar një gjyqtar, dhe në Laç, ku po ashtu janë bërë kallëzime, por nuk janë hetuar nga Prokuroria,” u shpreh Hoxha.
Sipas saj, vrasja e gjyqtarit Astrit Kalaja, ndërsa ishte në krye të detyrës, është rasti më i rëndë që tregon boshllëqet serioze në sistemin e sigurisë gjyqësore.
“Kam raportuar më parë për situata të tilla, por fatkeqësisht nuk ka patur reagim institucional. Kjo tragjedi tregon se paralajmërimet janë injoruar,” shtoi gazetarja.
